Ahmedabad, Nailar:
U Myntri ka tnat ki kam pohïing jong ka sorkar pdeng u Amit Shah ha ka sngi Palei u la plie ïa ka Gujarat Gaurav Sarovar, ka projek ban pynneh pynsah ïa ka um ha ka shnong Dudhala kaba don ha Lathi taluka jong ka distrik Amreli, bad u la kren shaphang ka jingkylla jong ka Gujarat na ka jingrang tyrkhong sha ka jingïoh um kaba kham bha.
La tei da ka Dholakiya Foundation, ba pynïaid da u Savji Dholakia uba la ïoh ïa ka khusnam Padma Shri, ïa kane ka pung um la shna ha ka jinglut kaba palat T.4 klur tyngka. Ka heh 80,000 phut square bad ka lah ban buh haduh 23 klur litar ka um.
“Lada ngi pynim ïa kawei pa kawei ka tdem um slap, kane ka thaiñ ne ka ri kin ym hap ban mad ïa ka jingkyrduh bam. Ka jingpynneh pynsah ïa ka um ka dei ka stieh kaba khlaiñ tam ban ïada na ka jingtyrkhong”, la ong u Shah.
Haba pynkynmaw ïa ki snem rang tyrkhong jong ki snem 1985-87, u Shah u la ong ba ka Gujarat ka la mad ïa ki jingeh kiba jur ha ka por ba ka Congress ka dang synshar. “Ngi kynmaw ïa kito ki snem ba ka Gujarat ka la shah ktah ha ka jingkyrduh bad ki briew ki la ïaleh wat na ka bynta ki jingdonkam ba man ka sngi”, u la ong.
U Shah u la pynkynmaw ba ha katei ka por u Narendra Modi u dei u Secretary jong katei ka seng bad u la ïalam ruh ïa ka ‘Nyay Yatra’. “Ngi dei ki nongtrei ba dang samla ha kito ki por. Ha ka jingshit kaba jur, ngi la ïaid na kawei ka ïing sha kawei pat, ngi la lum wat tang 250 gram ki ‘Sukhdi’ bad ki slipar kiba la rim khnang ban ïoh die ban kyrshan ïa ki kam ai jingïarap,” u la ong.
U la pynkynmaw ruh ïa kawei ka jingjia ha Rajkot, ha kaba ki dang tih ïa ka thliew kaba jylliew bha ban buh ïa ka top um. “Ki briew ki ïathuh ïa nga ba kam don um shuh wat tang ka umpohliew ruh kaba donkam. Kata ka dei ka jinglong jong ka Gujarat ha kata ka por”, la ong u Shah.
U Shah u la ong ba ka jinglong jingman jong ka um ha Gujarat ka la sdang ban kylla hadien ba u Modi u la long Myntri Rangbah ha u snem 2001. “Ka Saurashtra bad ka North Gujarat, kiba la ïakhun slem bha ïa ka jingduna um, ki la sdang ban ïoh um, bad ka jingrang tyrkhong suki suki ka la kylla long ka bynta jong ka Gujarat ba la dep,” u la ong.
“Mynta, ngi don ha u snem 2026. Ki lah ban don ki jingsngewkhia halor ka jingktah jong ka El Niño, bad ki don ki shnong kiba lah ban ïoh slap kham duna, hynrei ka Gujarat kam shym la sakhi ïa ka jinglong jingman ha kaba ki briew ki la shah pynbor ban mih noh na ki shnong jong ki ryngkat bad ki jingri jong ki ban wad um”, la ong u Shah.
Ha kaba ïadei bad ka projek Narmada, u Shah u la ong ba ïa u maw nongrim jong ka la buh da u Jawaharlal Nehru ha u snem 1964 bad la plie ïa ki khyrdop jong ka tang hadien ba u Modi u la long Myntri Rangbahduh. “Hadien kata, ka um Narmada ka la poi sha shiliang ka Saurashtra bad sha ka thaiñ Kutch”, u la ong.
U la kdew ruh sha ka tnad Jal Shakti, da kaba ong ba ka jinglah ban ai um jong ki dam ha kylleng ka ri ka la kiew da 160 percent khlem da pynlut shuh shuh ha ki jingtei kiba thymmai pura.
U Shah u la kren ruh shaphang ka jingkylla niam ha ki jaka riewlum jong ka South Gujarat, da kaba pynkynmaw ïa ki jingpyrshang ban seng ïa ki temple bad ki skul ha ki shnong ki thaw. U la ong ba ki jaka pule kin ïarap ïa ki khynnah ban kiew katba ki dang pynïadei bad ki riti dustur jong ki Sanatan.
