Thiruvananthapuram:
Ka tnat Enforcement Directorate (ED) ha ka sngi Palei ka la pynlong ïa ka jingkhynra ha ki bun tylli ki jaka ha ki distrik Kozhikode bad Palakkad ha kaba ïadei bad ka jingtohkit ïa ka pisa kaba ïadei bad ka jingshalan beaiñ ïa u drok Hybrid Ganja na Thailand, ong ki heh sorkar.
Katkum ka jingïathuh ki heh jong ka ED, ka jingtalasi ka dang ïaid ha ki jaka sah jong kiba shah kynnoh u Abu Tahir, u Harikrishnan, u Jagath bad u Jaisal kiba don ha Kozhikode bad Palakkad distrik.
Ha u Jylliew, mynta u snem, ki pulit ka Ernakulam Rural ki la kem ïa kawei ka longkmie bad ki la kurup kumba 18 kg u Ganja Hybrid, uba shong dor kumba T. 18 klur, na Perumbavoor.
U Ganja Hybrid, uba la rep da kaba pyndonkam da ki buit Hydroponic, la kynnoh ba la shalan beaiñ sha Keralam khamtam na Thailand.
Hadien kane ki pulit ki la kem sa khyndai ngut ki briew kiba la kynnoh ba ki dei ki bynta jong ka kynhun runar kiba donkti ban shalan tuh ïa u Hybrid uba bun bah na Thailand. Da kaba pynshong nongrim ha ka jingtohkit jong ki pulit, dang shen ka ED ka la mudui ïa ka mukotduma hapoh Prevention of Money Laundering Act (PMLA).
Ki heh jong ka ED ki la ïathuh ba ka jingtohkit banyngkong ka la lap ba kine kiba shah kynnoh ki dei kiba donkti ha kaba pynkhuid ïa ka pisa kaba heh kaba la ïoh lyngba ka jingkhaïi drok na Thailand sha India.
La kynnoh ba ki la phah pisa sha Thailand lyngba ki lad ki lynti kiba be-aiñ, la ong ki heh sorkar.
Ka kynhun ED ka dang wad bniah ruh ïa ka jingpynkheiñ ïa ka Foreign Exchange Management Act (FEMA) ha kane ka kam, la ong ki heh sorkar.
La kynnoh ruh ba ki nongshah kynnoh ki la shim wai ïa ki nongkit bad ki la ai visa bad pisa ïa ki ban shalan ïa ki dawai pynbuaid, la ïathuh ki heh sorkar.
Ki tyllong khubor jong ka ED ki la ïathuh ba katto katne na kiba shah kynnoh ba ki donkti ha katei ka kam runar ki dang don ha Thailand bad ki jingpyrshang ki dang ïaid shakhmat da ki pulit bad ka tnad ban wanrah biang ïa ki sha India, la bynrap shuh shuh ki heh sorkar.
