Jaipur, Nailur:
Ka Permanent Lok Adalat ha Bharatpur ka la ai khusnam T.23,36,774 sha kawei ka longkmie kaba la kynnoh ba ka la shah sumar Chemotherapy la palat ar snem hadien ba la lap bakla ba ka don ïa ka jingpang Cancer. Ka kashari ka la hukum ban siew kaba kynthup ïa ka 20 lak tyngka na ka bynta ka jingpang jingmut jingpyrkhat, ka jingjynjar ha ka met bad ka jingduhnong ha ka liang ka pisa tyngka, bad 3,36,774 tyngka na ka bynta ki bai sumar.
Katei ka hukum, ka la bthah ïa ki doktor bad ki kompeni Insurance, ba ki dei ban siew lang ïa katei ka bai lutksan, sha ka Laxmi Sharma, kaba dei ka nongshong shnong jong ka Bharatpur. Ka la leit sha ka Bhagwan Mahaveer Cancer Hospital and Research Centre ha Jaipur ha u bnai Risaw, 2020 da ka jingujor halor ka jingshitom kpoh bad ka jingbym sngewtynnat. Ki doktor ki la lap ba ka don ïa ka jingpang cancer katkum ki jingtest jong ka koit ka khiah bad ki la sdang ban sumar ïa ka.
Haba ka jingkoit jingkhiah jong ka kam shym la lah ban kiew watla ka la shah sumar slem, ki bahaïing jong ka ki la ïalam ïa ka sha Tata Memorial Hospital ha Mumbai ha u Kyllalyngkot, 2023. Ha ka jingtest bathymmai ha Mumbai hospital la lap ba ka Sharma ka don ïa ka jingpang shini, bad ym ïa ka jingpang Cancer.
Katkum ka jingong jong ka mukotduma, ka jingsumar dawai bym donkam ka la pynshitom ïa ka Sharma ha ka met bad ka jingmut jingpyrkhat. Ki bahaïing hasem bad kiba haïing hasem jong ka ruh ki la sahkut ha ka jingsngewsih hadien ba la ïathuh shaphang ka jingpang cancer.
