Tang da ka kjat jop marathon ka longkmie ba thrang kyrshan skul ïa ki khun

Mumbai, Nailur:

Kawei ka longkmie kaba la 47 snem ka rta ïa kaba la tip kyrteng kum ka Ramabai Ranveer, na Ambajogai ha Maharashtra’s Beed distrik, ka la jop ïa ka jingmareh Marathon na ka thaiñ da kaba ka la mareh 3 km tang da ka kjat suda bad da kaba shu sari ban ïoh pisa bad khur ïa ka khusnam na ka bynta ka jingpule jong ki khun kynthei jong ka, ong ki khubor.

Ïa kane ka jingïamareh, kaba la tip ha ka thaiñ kum ka ‘Amrit Daud’, la pynlong kum shi bynta jong ki jingrakhe ban pyni ïa ka jingrakhe kaba kongsan jong kawei ka jaka pule ha ka shnong. Kane ka marathon ka la kynthup ïa ka lynti ïaid na Chhatrapati Shivaji Maharaj Chowk haduh Bhagyanagar Chowk bad ka la khring ïa ki nongïashim bynta ha ki rta bapher bapher.

La ïathuh ba ka Ranveer, ka la sdang ïa katei ka jingmareh, da kaba phong ïa ka sari bad ki slipar. Hynrei katba ka dang mareh, ki slipar jong ka ki la sdang ban sniew ha surok, kaba la pynlong ïa ka ban shem jingeh ban pynneh ïa ka jingstet jong ka. Da kaba kut jingmut ban ym ailad, ka la weng noh ïa ki bad ka la bteng ban mareh khlem juti.

Watla ka la ïakhun pyrshah ïa ki nongïashim bynta kiba kham samla kiba la phong da ki jaiñ ïalehkai bad ki ju phong ïa ki juti ïalehkai ba tbit, hynrei ka Ranveer ka la pynneh ïa ka jingïalehkai jong ka bad khatduh ka la ïaid lait nyngkong ïa u laiñ ba kut.

Ka jingjop kaba khlem khmih lynti jong ka ka la khring ïa ka jingpyrkhat bad jingsngew na ki nongpeitkai bad ki para nongïashim bynta.

Hynrei na ka bynta ka Ranveer, ka jingïakop ka long kaba kham palat ban ïa ka jingjop. Ka la shah pynshlur ha ka lad ban ïoh ïa ka khusnam da ka pisa, kaba ka la thmu ban pyndonkam sha ka jingpule bad ki kot jong ki khun kynthei jong ka.

La ïathuh ba ka khusnam ba thikna ka long T.3,000. Hynrei ka Ranveer ka la ong ba ka la ïoh T.5 hajar bad ka la thmu ban pyndonkam ïa katei ka pisa ban thied ïa ki jingdonkam jong ki khun ha ka jingpule jong ki.

“Nga sngewkmen haduh katta katta ba ki la ai ïa nga T. 5 hajar ha ka jaka jong ka T. 3 hajar. Nga la thied ïa ki kopi bad ki khulom na ka bynta ka Pooja ka khun jong nga. Ka pisa kaba sah ka dei na ka bynta ka Arti” ong ka tyllong khubor kumba la kren da ka Ranveer.

Ka jingjop naduh kata ka por ka la kylla long ka khana shaphang ka jingshlur bad ka jingïaishah ha Ambajogai.

Ka jingjop kaba phylla jong ka ka la ïoh ïa ka jingïakynduh ha ki social media.