Jerusalem, Nailur:
U Itamar Ben Gvir, myntri ka tnat iada ri jong ka Israel, uba dei na ka liang ka diang tam jong ka Israel, u la buh ïa ka buit ha ka sngi Thohdieng, ban weng noh ïa ki nong Palestine na Gaza Strip bad ban phah ïa ki shabar ri.
Haba kren ha ka jingkhreh ïa ka elekshon Israel kaba la ïakhun bha, u la ong ba kane ka jingthmu ka thmu ban ïohi ïa ka jingmih noh jong ki 250 hajar ngut ki nong Palestine na Gaza ha u snem ba nyngkong, bud sa kiwei pat kiba sah kumba ar million ngut ki nongshong shnong ha ki hynriew snem ban wan.
“Ka long kaba shisha”, la ong u Ben Gvir, da kaba kam ba ki don ki ri kiba “khreh” ban shim ïa ki nong Gaza, khlem da jer kyrteng ïa ki.
“Ngi dei ban pynshlur ïa ka jingwan buhai shnong jong ki nongshong shnong jong ka Gaza”, u la ong bad bynrap ba u ngeit ba katei ka jingthmu kam mut ban pynbor ïa ki nong Palestine ban mih noh na ka jaka jong ki.
Ka jingpynkynriah jubor ïa ki riew paidbah ha ki jaka ba la shah knieh la khein kum ka kam runar thma katkum ki kyndon jong ka Geneva Conventions.
Na ka bynta ki nong Palestine, kano kano ka jingpyrshang ban pynbor ïa ki ban mih noh na ka ri jong ki kan pynkynmaw ïa ka “Nakba”, lane ka jingjia ba shyrkhei — ka jingshah pynkynriah jaka jong ki ha ka por ba la thaw ïa ka Israel ha u snem 1948.
Ki jingkynthoh kiba pynkhihwin na u Ben Gvir, uba dei u myntri ba kongsan ha ka kynhun synrop jong ka liang ka diang jong u Myntri Rangbahduh ka ri, u Benjamin Netanyahu, ki ju wanrah ïa ka jingpynrem jong ki ri ka pyrthei.
