Bah Augusten Blah
(Ba bteng)
Ka jingbishar jong ka PRS Legislative Research halor ka State Budget ka pynskhem ïa ka jingdon jong ka? 1,404-klur Police allocation na bynta u snem 2026-27.
Ha kajuh ka rukom, ka 25.24-klur ASUMP proposal ruh kam dei ban batai kum ka pisa kaba la dep pynlut.
Don ka jingïapher kaba kongsan hapdeng:
Allocated, Sanctioned, Released bad Actually Spent.
Na bynta ka jingshañiah jong ki paidbah, kine ki jingïapher ki dei ban neh kiba shai.
Ka jingkitkhlieh kam dei ban mut ka jingkynnoh
Haba la shem ba kawei ka public infrastructure kam treikam bha, ka don ka jingpynshoi ban kylli mar mar:
“Mano uba bakla?”
Ka jingkylli kum kane ka lah ban don ka jaka jong ka hadien.
Hynrei, ha kane ka por, ka jingkylli kaba kham tei ka long:
“Kaei ka system kaba lah ban pynthikna ba kane ka jingeh ka nym jia biang?”
Ki CCTV equipment kin poi sha ka por ba kin duh treikam.
Ka leilieh ka lah ban pynjulor ïa ki.
Ki mechanical components ki lah ban don jingduna.
Ka bording bad connectivity ki lah ban dkut.
Ka teknoloji ka lah ban kylla rim.
Ki jingmaramot ki lah ban shim por.
Ka jingdon jong ki equipment kiba ym treikam, tang marwei, kam pynshisha ba don ka jingbakla ne wrong doing.
Kaba kongsan ka long la don ne em ka system kaba lah :
“ban ithuh kloi ïa ki jingduna;
“ban report ïa ki jingeh ha ka rukom kaba biang;
“ban maramot kloi;
“bad ban pynshai ïa ka jingkitkhlieh ha man la ka kyrdan.
Hangta hi ka jingkitkhlieh ka kylla long kaba don jingmut.
Ban thew ïa ka jingmih, ym tang ïa ki tiar
Ka governance ha ka juk teknoloji kam lah ban shah thew tang da ka procurement.
Ki 1,000 tylli ki cameras kim dei beit kiba kham bha ban ïa ki 500 tylli.
Lada ki 500 tylli ki cameras ki record beit, ki buh ïa ka footage ha ka rukom kaba shngaiñ bad la peit ïa ki manla ka por, ki lah ban ai ka jingmyntoi paidbah kaba kham bun ban ïa ki 1,000 tylli ki cameras kiba bun na ki kim treikam haba la donkam.
Kane ka nongrim ka treikam ha baroh ki jait public infrastructure.
Ka surok ka don jingmyntoi haba lah ban pyndonkam ïa ka.
Ka hospital ka don jingmyntoi haba ka lah ban ai ïa ki jingshakri kiba treikam.
Ka communication network ka don jingmyntoi haba ka treikam.
Bad ka CCTV camera ka don jingmyntoi haba ka peit, ka record bad ka pynneh ïa ki sakhi ha ka por kaba donkam.
Ka lad kaba don hakhmat Meghalaya
Ka jinglong kaba mynta kam dei ban peit tang kum ka jingeh.
Ka long ruh ka lad.
Lada ka proposed modernisation programme ka ïaid shakhmat, Meghalaya ka lah ban pyndonkam ïa kane ka lad ban tei ïa ka CCTV system kaba ym dei tang kaba kham heh, hynrei kaba khamskhem bad kaba lah ban shañiah.
Ka jingpynlut ha ka por ban wan ka lah ban kynthup ïa :
“ki maintenance standards kiba shai;
“ki response times kiba la buhlypa na bynta ki faults;
“ki technical audits kiba ju long;
“ka performance monitoring kaba transparent;
“ka storage bad backup kaba shngaiñ;
“ka jingkitkhlieh kaba shai ha man la ka kyrdan;
“bad ka performance data kaba ki paidbah ki lah ban pynshisha bad peit.
Kaba kham kongsan tam ka long ba man la ka installation kaba thymmai dei ban don ryngkat bad ka long-term maintenance strategy.
Ka jingbuh ïa ka camera ka dei ka jingsdang jong ka jingim jong ka ha ka jingshakri paidbah, ym ka jingkut jong ka project.
Shuwa ban buh sa ïa ka camera ka bathymmai
Shuwa ban buh sa ïa ki cameras kiba thymmai, Meghalaya ka donkam shisha ïa ka modern policing.
Ka donkam ïa:
“ki briew kiba la ïoh jinghikai bha;
“ki communications kiba khambha;
“ka teknoloji kaba lah ban shañiah;
“ka infrastructure kaba biang;
“bad ki tiar kiba lah ban ïarap ban jubab ïa ki rukom kam sniew kiba dang kylla man ka por.
Ka CCTV ka lah ban long ka bynta kaba kongsan jong kane ka jingtrei.
Hynrei, ka modernisation kam dei ban mut tang ka jingthied ïa ki equipment kiba kham bun.
Shuwa ban pynïar ïa ka network, ka State ka ïoh ïa ka lad ban buh ïa ka nongrim kaba shai :
Katno tylli ki cameras ngi don?
Katno tylli ki treikam ?
Katno tylli kim treikam ?
Balei kim treikam?
Naduh lano ki la sah kumta ?
Bad kaei yn leh ban pynthik naba kajuh ka jingeh kan ym jia biang?
Kine kim dei ki jingkylli pyrshah-Sorkar.
Kim dei ruh ki jingkylli pyrshah-pulit.
Ki dei ki jingkylli kiba ïadei bad ka good governance, ka jingpyndonkam kaba don jingkitkhlieh ïa ka pisa paidbah bad ka jingshañiah jong ki paidbah.
Ka Meghalaya High Court ka la dawa lypa ïa ka dur kaba kham bniah shaphang ka CCTV infrastructure jong ka State.
Ka jubab kaba kham tei tam kan long ban ai ïa ka dur kaba:
Bniah, kaba transparent bad kaba lah ban pynshisha.
Namar ha kaba kut, ki nongshong shnong kim kyrpad ïa ka State tang ban peit ïa ki.
Ki kyrpad ïa ka State ban ïada ïa ki.
Bad haba ka pisa paidbah ka siew ïa ka security camera, ka paidbah ka don hok ban khmih lynti ba haba ka por kaba donkam kan wan, ka camera kan long kaba peit, kaba record bad kaba pynneh ïa ka jingshisha. (La Kut)
