Bengaluru, Nailur:
U Myntri ka tnad ka koit ka khiah u UT Khader u la ong ba kito kiba donkti ha kaba shna bad khaïi ïa ki dawai thok ki dei ban mad ïa ki jingpynshitom kiba tyngeh ban ïa kaba shu weng license lane daiñ kuna. Da kaba khot ïa katei ka jingjia kum ka “jingplie khmat”, u la ong ba ka jylla kan kyntu ïa ka sorkar pdeng ban pynkylla ïa ki aiñ khnang ba ki nongleh kam sniew kin shah pynngat hapoh ki jingshah kynnoh kiba khia, kynthup ïa ka jingpyrshang ban pynïap ne pynïap briew, namar ba ki buh jingma ïa ka jingim briew.
Haba kren sha ki lad pathai khubor, u Khader u la ong ba ka jingtohkit ba nyngkong ka la lap ba ïa kitei ki dawai thok la shna ha ki jylla bapher bapher bad la wanrah sha Karnataka shwa ban pynpoi sha ki jaka bapher bapher jong ka ri.
Hadien ka jingïakren bad u Myntri Rangbah ka jylla bad Myntri ka tnat ki kam pohïing, ka sorkar ka la rai ban thaw ïa ka kynhun Special Investigation Team (SIT) kaba kynthup ïa ki ophisar pulit bad ki ophisar na ka tnad Drugs Control bad Commercial Taxes.
Ka kynhun kan tohkit ruh ïa ka tyllong jong ki Invoice bad ki Voucher ba la pyndonkam ha katei ka jingtreikam.
Ka sorkar ka la dep bthah ban weng noh ïa ka Batch jong ki dawai thok ba la ïoh kurup na ki hospital bad ki dukan die dawai. U Khader u la ong ba ka kynhun SIT kan tohkit ïa ka jingïoh kurup ïa ki dawai thok kiba shongdor palat T. 5 klur ha Bidadi, da kaba kdew ba katei ka jingleh thok ka paw ba ka don ka jingïadei hapdeng ki jylla bad kiba donkti kin ym lait.
U Khader u la ong ba ka sorkar ka dang wad bniah ban thaw ïa ka Laboratory kaba heh lane ban ïatreilang bad ka Lab kaba la don lypa ban leh ïa ka Random Quality Test ïa ki dawai ba la lum na ki karkhana, ki hospital bad ki dukan die dawai.
U la ïathuh ba u la thoh sha u Myntri ka tnat ka koit ka khiah jong ka sorkar pdeng ban pan ïa ka jingpynrung ïa u ophisar ba peit ïa ki dawai jong ka sorkar pdeng ban ïarap ha ka jingtohkit. Namar ba ka dor jong u drok ba la ïoh kurup ka palat ïa ka 5 klur tyngka, ka sorkar pdeng ka lah ruh ban hukum ban tohkit da ka kynhun CBI, u la bynrap.
