Guwahati, Nailur:
Ka sorkar Assam ka dang pyntreikam ïa ka plan ban pynsuk ïa ki jingbei tyngka kiba kot sha ka T.50,000 klur ha kane ka jylla kum shi bynta jong ka Viksit Assam 2047, la ong u Myntri Rangbah ka jylla u Himanta Biswa Sarma hadien ka jingïalang jong ki District Commissioners’ Conference kaba ar sngi ha Jorhat.
Kane ka jingïalang kaba la pynkut ha ka por shiteng miet jong ka 14 tarik u Nailur, ka la pynleit jingmut ha ki kam pynroi ha ka kyrdan jong ki distrik bad ban pynbha ïa ka jingpynpoi ïa ki skhim sorkar bad ki jingshakri paidbah.
U Sarma u la ong ba ka jingthmu ban bei tyng kan kynthup ïa ki projek pynroi jong ka sorkar kum ka jingtei ïa ki Anganwadi Centre, ki madan ïalehkai kiba thymmai bad ka jingpynbha ïa ki jingtei ha ki jaka pule, naduh ki skul haduh ki skulbah.
La ai jingtip sha ki District Commissioner halor ki projek ba la tyrwa na ka bynta la ki jong ki jong ki distrik.
Ka jingpynduna ïa ka jingpep skul jong ki khynnah skul ha ka kyrdan Secondary ka dei kawei pat ka mat ba kongsan kaba la ïakren ha katei ka jingïalang.
Ki heh sorkar ki la bishar bniah ruh ïa ka jingpyntreikam ïa ki skhim sorkar bapher bapher bad ki jingshakri paidbah.
Ha kane ka jingïalang la bishar bniah ïa ka jingïaid shaphrang jong ka TB Mukt Bharat Abhiyan, ki jingthmu na ka bynta ki Medical College bathymmai bad ka jingpynkylla stet ïa ki 4000 tylli ki Health Sub-Centre sha ki hospital, ka kyndon ba la pynbna ha ka mang tyngka jong ka jylla.
Ka sorkar ka la ïakren ruh ban thaw ïa ki Land bank ha man la ki distrik ban kyrshan ïa ka jingkiew ha ki karkhana namar ba ka Assam ka ïoh ïa ka jingtyrwa ban bei tyngka kaba nangroi.
U Sarma u la ong ba ka Gujarat bad ka Maharashtra ki la buh kyrpang haduh hynñiew lak bigha ki jaka kum ki Land Bank, katba ka Assam mynta ka don duna ïa ka 10 hajar bigha kiba lah ban ïoh na ka bynta ban pynroi ïa ki karkhana hadien habud.
Ha kane ka jingïalang la bishar bniah ruh ïa ki jingpynkhreh na ka bynta ka Khel Maharan ka ban sa wan bad ban shna biang ia ki kynroh kiba la shah pynjulor ha ka jingshlei um dang shen.
La ïakren ruh halor ka jingpyntreikam ïa ki prokram ba la buh kyrteng ha ka Sankalpa Patra jong ka sorkar jylla.
Kane ka jingïakhih kaba shibnai kan don ïa ki jingïakop dro dur, ki jingkylli bad ki jingïakop kren, ryngkat bad ki prokram ai khublei ïa ki nongtrei Anganwadi, ki nongtrei ASHA bad ki nongshet jingbam shiteng sngi.
