Khliehriat, Nailur 20
Ka SWO Moosiang Lamare Old SC ka la long ka lahduh ha ka 2nd Division Football League 2026 ba la pynïaid da ka East Jaiñtia Hills District Football Association (EJHDFA), hadien ba ka la pynliem noh ïa ka Dkhiah West SCSO da 2-1 kol ha ka phainal kaba la long ha ka sngi Saijaiñ ha madan Diengshynrum, Khliehriat.
Ïa ki kol jong ka Moosiang Lamare Old la thep da u Premio Muksor (25) bad u Rejency Lapasam (70), katba ïa ka shi kol jong ka Dkhiah West la thep da u Kyntulang Phawa (30).
Lyngba kane ka nam jop ka Moosiang Lamare ka la ïohpdiang ïa ka khusnam pisa kaba 50 hajar tyngka bad kaba wan ba-ar ka la ïoh T. 25 hajar tyngka. Ïa ka nam Top Scorer la khur da u Pynïar Pusein, uba ka thep 4 kol ha kane ka lympung, Best Goalkeeper ka leit sha u Kynti Muksor bad Best Player sha u Meshwa Lapasam. Kine baroh ki dei na ka kynhun SWO Moosiang Lamare Old SC.
Ïa ki khusnam la sam da bah Pynlumlang Ksoo kum u kongsan, ha ka jingdonlang u Bah Dimos Swer ryngkat ki nongïalam bad dkhot nongkitkam ka EJHDFA bad kiwei.
