Shillong, Nailur 20
Ka kynhun ki ‘thei ïaleh -kai ka Jylla ka la lah ban pynpaw ïa ka jingtbit ha kaba ka la pynliem noh ïa ka Punjab da 2-1 kol ha ka jingïalehkai ka Group-C jong ka Dr Talimeren Ao National Football Champion -ship na ka bynta ka Junior Girls (Tier 2) 2026-27.
Ha kane ka jingïakhun ka Meghalaya ka la shah thep kol nyngkong ha ka minit kaba 10, hynrei ka lah ban pynïakhaid kylla ha ka minit kaba 61 lyngba ka Ripaia Phawa hashwa ba kan thep biang sa shi kol hashwa ban wai lyngba ka Peacefully Pohplet (90’+4) ha Narainpur, Chhattisgarh.
Ha kane ka Group-C la don sa tang lai tylli ki kynhun na ka daw ka jingweng noh ka Nagaland na kane ka lympung. Hadien ba ka la jop da 8-0 kol ha kaba sdang kane ka lympung pyrshah ïa ka Jammu and Kashmir, ka Meghalaya ka la kamai 6 poiñ bad ka la ïoh ban bat ï aka kyrdan ba hakhlieh ha kane ka group.
Ha kane ka jingïa-khun, ka coach ka Megha-laya ka Haphilabet Khar-kongor ka la wanrah ka jingkylla da kaba sei ïa ar ngut ki ‘thei ïalehkai kata ka Venecle Kharmusul-man bad ka Deiphiwan-sara Lyngkhoi ha ka ‘1st eleven’ ha ka jaka ka Saralang Lapang bad ka Bansara Rynshiang.
Haba sdang kane ka jingïakhun ka Meghalaya kam shym la lah ban shan ha ka jingtbit ki ‘thei ïalehkai ka Punjab ha kaba ka Japleen Kaur (10′) ka la ïoh ban pynkih jar.
Hadienkatto katne por ba la bteg ïa ka kylla miet, ka Meghalaya ka la lah ban pynïakhaid kylla lyngba ka Ripaia (61’) na ka bynta ban ïakhaid mar shi kol.
Kane ka jingïakhaid ka la pynlong ïa kine ki kynhun ban pyrshang ha ka ban ïakhun tyngeh shuh shuh. Hynrei hashwa ban wai ka Meghalaya ka la ïoh ban thep biang sa shi kol lyngba ka Peacefully (90’+3) kaba la shut ïa ka free-kick ha kaba ka nongapkol ka Punjab kam shym la lah ban khanglad na ka jingshah thep.
Lyngba kane ka jingjop, ka Meghalaya ka la thikna ban rung sha ka semi final watla kam donkam ban ap na ka jingmih na ka jingïakhun hapdeng ka Punjab pyrshah ïa ka J&K ka ban long ha ka 22 tarik mynta u bnai.
Te kumta ka Megha-laya kan hap ban ai ap shipor ban ïakhun semi final, pyrshah ïa ka kynhun nongjop na ka Group-A ha ka 25 tarik.
