Shillong, Nailur 20
Ka India ka la sdang ïa ka Asian Games 2026 ha Aichi-Nagoya da kaba khur ar tylli ki takma rupa ha ka sngi U Blei lyngba ki nongïalehkai siat suloi 10m air rifle, ha kaba ka Elavenil Valarivan ka la long ka nongsiat kaba kynsai ha kane ka sngi.
Kane ka kynhun ïalehkai ka ri ka don jingkyrmen ruh ban khur takma, ha kaba ka kynhun ïalehkai kriket bad hockey ki la khur jingjop bad kumjuh ha ka badminton bad table tennis ki la pyrshang ban ïalehkai.
Ka Valarivan ka la ïasoh lang ryngkat Sonam Uttam Maskar bad ka Vidarsa Vinod ha kaba ki la khur ïa ka takma rupa ha ka 10m air rifle team jong ki kynthei hashwa ba kan bynrap biang sa kawei ka takma rupa ha kane kajuh hi ka sngi ha ka jingïakop siat kaba para marwei.
Kane ka long ka takma kaba nyngkong eh ïa katei ka ‘thei ïalehkai kaba dang 27 snem ka rta namar kam shym la la lah ban khur takma ha ki ar tylli ki jingleit shim bynta ha ka Asiam Games ba la la lah. Ka la lah ban kamai 252.4 ha ka phainal bad pyndep da 0.6 poiñ hadien ïa ka Hinata Taichi na Japan, kaba la khur ïa ka ksiar da kaba khur ïa ka rekod ha ka Asian Games da kaba kamai 253.0. U Ban Hyojin na South Korea u la khur ïa ka nam rnong da kaba kamai 230.4.
Kitei ki ar tylli ki takma rupa jong ka India ha ka jingïakop siat suloi ki la long ki jingaimynsiem ha kane ka sngi sdang kumba ka la lah ban khur 22 tylli ki takma ha ka Asian games kaba la long ha Hangzhou.
Lyngba kane ka jingïakop siat suloi, ka India ka la thikna ban khur takma biang lyngba ka Suchika Tariyal. Kane ka ‘thei ïalehkai ba la 36 snem ka rta ka la lah ban pynliem ïa ka nongsiat kaba Mongolia ka Altanchimeg Baigalmaa da 2-0 ha ka quarter final jong ka MMA 60kg na ka bynta ban jam sha ka semi final.Te kumta ka India ka la thikna ban khur ïa ka takma rnong.
Ka jinglah ban ïalehkai bha ka la pyni ïa ka jingkiew ha ka jingïaleh-kai MMA kaba long ka sien kaba nyngkong ha ka Asian Games ha Aichi-Nagoya. Ka Tariyal, kaba la ju ïakhun mynshwa ha ka judo, ka la kylla sha ka MMA ha u snem 2024 bad ka la khur ïa ka ksiar ha ki ar tylli ki jingïalehkai MMA-SFI National Championship.
Ka la khur ruh ïa ka takma rnong ha ka sien kaba lai bad basaw ha ka Asian Mixed Martial Arts Champion -ships dangshen mynta u snem.
Ha ka jingïalehkai kriket jong ki kynthei, ka India ka la pynliem noh ïa ka Bangladesh da 114 run ha ka semi final.
Da kane ka jingjop ka India kan pynkhreh ïa ka jingïakhun final ha ka sngi Ba-ar pyrshah ïa ka Sri Lanka n aka bynta ban ïaknieh ïa ka takma ksiar. Ka Sri Lanka ka dei ka kynhun kaba la jop ïa ka Pakistan ha kawei pat ka semi final.
