Ahmedabad, Nailur:
Ki Pulit jong ka Gujarat ki la pynjur ïa ka jingkhynra ha baroh kawei ka jylla ïa ki kali kiba don ïa ki number plate kiba jah, kiba la pynkylla dur, kiba la buhrieh ne kiba pynitynnad bha, ha kaba ki la register haduh 18,014 tylli ki jingmudui bad la kem haduh 4,187 tylli ki kali hapdeng ka 1 tarik bad ka 20 tarik, Nailur.
Ka jingpynjari aiñ ka la pynlong ruh ïa ka jinglum pisa kumba 58.56 lak tyngka na ka bynta ki jingpynkheiñ ïa ki rukom buh nombar kali.
La sdang ha ka 1 tarik u Nailur hapoh ka jingïalam jong u heh pulit ka jylla, u Gyanendra Singh Malik, kane ka jingïakhih ka thmu ban pynthikna ïa ka jingbud ryntih ïa ki kyndon ba la buh ban pynrung kyrteng ïa ki kali bad ban pynkhlaiñ ïa ka jingshngaiñ ha surok. Ki kynhun pulit ha kylleng ki distrik bad ki nongbah ki la pynlong ïa ka jingkhynra ban lap ïa ki kali kiba don a ki number plate bym biang.
Ka Vadodara City, ka dei kaba bun eh kiba ïoh ïa kane ka jingpynkheiñ kyndon, ha kaba ki don 1,959 tylli ki jingjia bad bud sa ka Surat City, kaba don 1,786 tylli bad ha Banaskantha, kaba don 1,363 tylli.
Ki jingpeit bniah ki long halor ki nombar plate kiba don ki Font ba itynnad, ki nombar ba la buhrieh, ki dur ba la pynkylla ne kiwei kiwei ki jingpynkylla kiba lah ban pynlong jingeh ban ithuh ïa ki number kali.
U SP jong ka tnad pynïaid kali jong ka jylla u la kyrpad ïa ki trai kali bad ki nongñiah kali ban pynthikna ba ki nombar kali jong ki kin long kiba shai, kiba lah ban ïohi bad kiba ïahap bad ki kyndon.
Katkum ka jingong jong ki pulit, ki jingpyrshang ban pynlong ïa ki nombar pynrung kyrteng kiba eh ban pule lyngba ki jingshna ba itynnad, ki dak ba la buhrieh ne ki jingpynkylla khlem jingbit ki lah ban khot ïa ka jingshah pynngat ha ka aiñ.
