Patna, Nailur:
Ki la don palat 50 lak ngut ki briew ki la shah ktah ha ka jingshlei um ha Bihar, ha kaba 576 tylli ki Gram Panchayat ha kylleng ki 15 tylli ki distrik ki la shah rong noh ha ka um bad ki wah kiba heh, ba kynthup ïa ka Kosi bad Ganga, ki la tuid palat ïa u dak ba ap jingma, ong ka tnad Disaster Management ha ka sngi Balang.
Ki bor pynïaid ki pynïaid ïa lai tylli ki jaka shet jingshet jong ki paidbah katba 7,714 ngut ki briew kiba la shah pynkynriah jaka ki shah rieh ha ki hynriew tylli ki jaka ai jingïarap bad ki jaka sah ba shipor, la ïathuh ka tnad Disaster Management ha ka sngi Balang.
Kat kum ka jingkheiñ jong ka, kumba 50.49 lak ngut ki briew ki la shah ktah ha ka jingshlei um ha ki 15 tylli ki distrik jong ka Bihar, ha kaba ka jingkiew jong ka um ka la pynthut ïa ka jingim ha ki 576 tylli ki Gram Panchayat.
Ki distrik kiba la shah ktah ki long ka Patna, Bhojpur, Saran, Vaishali, Bhagalpur, Begusarai, Buxar, Samastipur, Munger, Katihar, Lakhisarai, Khagaria, Purnea, Madhepura bad Arwal.
Ka wah Kosi ka la tuid palat ïa u dak ba ap jingma ha Baltara bad Kursela, katba ka wah Ganga ka la ïaid lyngba ka kyrdan jingma jong ka ha Kahalgaon.
Lai tylli ki jaka bam jong ki paidbah ki shakri ïa ki briew kiba shah ktah ha ka jingshlei um, hadien ba ki la pynbiang kumba 1.96 klur ki jingbam haduh mynta.
Hynriew tylli ki jaka sah ba shipor ki pynsah ïa ki 7,714 ngut ki briew kiba la shah pynkynriah jaka, nalor ba ki ai jingbam bad jingsumar,” ka la ong.
Ki la don kumba 27 tylli ki kynhun jong ki shipai State Disaster Response Force bad 8 tylli jong ka kynhun National Disaster Response Force ki la don bynta ha ka ban pyllait im bad ai jingïarap ïa ki lanot da ka jingpyntreikam ïa ki 391 tylli ki lieng.
Ka jylla ka la ïoh slap 661.9 mm naduh ka 1 tarik u Jylliew, kaba la pynjur ïa ka jingshlei um. Wat hapdeng kane, ka Bihar ka la ïoh ïa ka jinghap slap kaba duna 29 percent ïa kaba ju long, la ong ka ophis jong ka mariang.
Ka la antad ba kan don u slap uba rit haduh uba jem ha kiba bun ki jaka bad u slap uba jur ha ki katto katne ki jaka naduh ka 23 haduh ka 26 tarik u Nailur.
