Patna, Nailur:
U Samrat Choudhary, Myntri Rangbah ka Bihar, ha ka lah sngi U Blei, u la shim ïa ka jingkheiñ ïa ka jinglong jingman jong ka jingshlei um ha ka thaiñ Shatei-lam-Mihngi jong ka Bihar, hadien ka jingtuid um na Nepal, kaba la ktah ïa ki katto katne ki distrik, ba kynthup ïa ka West Champaran, East Champaran bad Gopalganj.
U Choudhary ha ryngkat ka jingsynran lang u Symbud Myntri Rangbah ka jylla uba dei ruh u Myntri ka Water Resources u Vijay Kumar Chaudhary, u la pynlong ïa ka jingjurip na suiñ ïa ka jinglong jingman jong ka jingshlei um ha East Champaran, Gopalganj, Vaishali bad Saran District.
U la pynlong ruh ïa ka jingïalang bad ki heh sorkar ban bishar bniah ïa ka jinglong jingman.
U Myntri Rangbah u la jurip ïa ka jingkiew jong ka um, ka jingtuid na ki jingker, ka jinglong jong ki kynroh bad ka jingpahara miet.
U la bthah ïa ki heh sorkar ba kin long kiba husiar bad pynkhreh ban ïaleh pyrshah ïa kano kano ka jingjia ba kyrkieh.
Ha kane ka jingïalang la ïadonlang u MP ka BJP u Radha Mohan Singh, u Chief Secretary u Pratyaya Amrit, u Magistrate District ka Gopalganj u Saurav Samir bad u SP u Vinay Tiwari. Ki heh sorkar ki la jurip ruh ïa ka jingkieng Dhumariaghat kaba don ha Gopalganj distrik.
U Choudhary u la bthah ïa ki heh sorkar ban sdang ïa ki jaka ai jingïarap ha ki jaka ba shah ktah ha ka jingshlei um. La buh ruh ïa ki jaka bam paidbah ha ki katto katne ki jaka ban pynbiang jingbam ïa ki briew kiba shah ktah. Ka jingkiew jong ka um ha Gandak ka la pynlong ïa ki nongshong shnong ban sngewtieng.
“U Myntri Rangbah ka jylla u la bthah ïa ki heh sorkar ban buddien beit ïa ki jaka kiba rit paid bad kiba rit, ban pynthikna ban ai jingïarap kloi ïa ki briew kiba shah ktah bad ban pynneh ïa ka jingpynkhreh kaba pura na ka bynta ki kam pynlait im,” la kdew ha ka kyrwoh ba la pynmih da ka ophis jong u Myntri Rangbah ka Jylla.
U Choudhary u la leit jngoh ïa ka wah Gandak, u la leh ïa ka jingpeit bniah na suiñ ïa ki jaka ba shah ktah ha ka jingshlei um hapdeng ka jingshlei um ha Nepal.
La bthah ïa ki heh jong ka distrik ba kin ïatreilang bad ki kynhun jong ka SDRF bad NDRF, ong ka kyrwoh. U Choudhary u la buddien ruh ïa ka jinglong jingman jong ka jingshlei um ha baroh kawei ka miet jong ka sngi U Blei na ka Water Resources Department (WRD) Command Centre ha Patna.
Ha kajuh ka por, ka Nepal ka la pyntuid ïa ka um kaba la rekod haduh 6.52 lak cusec na ka Devghat Gauge station jongka, kaba la pynkiew ïa ka um ha ki katto katne ki wah, kynthup ïa ka wah Gandak. Ki heh sorkar ki la ïathuh ba ka jingtuid um kaba heh tam mynshwa ka long 5.26 lak cusec ha ka 27 tarik u Nailar, 1999.
Ka Gandak, ka la ïoh ïa ka jingtuid um kaba 5,43,500 cusec ha Gandak Barrage kaba don ha Valmikinagar, West Champaran distrik, ha ka por 5.00 baje mynstep jong ka lah sngi U Blei.
Katkum ka jingpynbna jong ka WRD, ka jingtuid um ha ka jaka buh um ha Valmikinagar ka la hiar hadien kata, kaba pyni ba ka jinglong jingman ka lah ban nangbha. Hynrei ka jingheh jong ka um kan shim por katto katne por ban ïaid lyngba ki jaka kiba don shapoh wah.
