Patna, Nailur:
Ka Supreme Court, ka la pynngat da ka kuna kaba T.10 lak, ïa ka sorkar Uttar Pradesh, da kaba ong ba kano kano ka jingshah set patok, kam lah ban long katkum ki jingphla ba la kynnoh ba la ïoh ha ka jingshah set patok jong ki pulit.
U Justice Dipankar Datta bad u Sheel Nagu ki la pynbna ïa kane ka rai haba kyntait ïa ka jingujor ba la mudui da u Mulla Afroz, uba shah kynnoh ha ka Sambhal Violence Case jong u snem 2024.
U Mulla Afroz, u dei uba la shah kem ha ka Section 3(2) jong ka National Security Act (NSA) ha u bnai Risaw,2025, na ka daw jong ka jingïakynad kaba jur bha ha ka por ba pynlong ïa ka jingjurip ïa ka Sambhal Shahi Jama Masjid, ha kaba saw ngut ki briew ki la ïap.
Ki heh sorkar jong ka jylla Uttar Pradesh ki la pynshisha ïa ka jingkem ïa u da kaba pynshong nongrim ba ki kam jong u ki buh jingma ïa ka suk ka saiñ paidbah bad kumta la donkam ban shim ïa ki lad ki lynti kiba tyngeh ban pynneh ïa ka jingsuk.
Ka Supreme Court ka la pynmih ïa ka jingartatien halor ka jinglong aiñ jong ka jingpynshisha hi kaba la ai da ka jylla ha kaba ïadei bad ka jingkhot ïa ka jingshah set phatok ban ïada halor ki jingkren ba la ai da u briew uba don ha ka jingshah set jong ki pulit.
U Afroz u la mudui ïa ka jingujor shuti ba kyrpang ban tuklar ïa ka jingkyntait ïa ka jingmudui jamin jong u kaba la mudui ha u bnai Jylliew, 2026 da ka Ïingkashari Allahabad High Court ban kyrshan ïa ka jinglong trai jong u District Magistrate ha kaba pynmih ïa kum kine ki hukum.
Ka ïingbishar ba hakhliehduh ka la pynkut ïa ka jingbishar bad ka la buh kyrpang ïa ka rai ha ka 8 tarik u Nailur shwa ban pynmih ïa ka rai ba khatduh bad ka jingpynshitom pisa pyrshah ïa ka bor synshar jylla.
Ka rai ka buh ïa ka nongrim aiñ kaba pyrkhing bha ha kaba ïadei bad ki pud jong ka jingshah set phatok ban ïada bad ka jingbym lah ban pdiang ïa ki jingphla kiba la pynshong nongrim ha ka jingshah set phatok na ka bynta ban khanglad ïa ka jinglaitluid shimet.
