Bhubaneswar, Nailur:
Ka sorkar pdeng ka la shim khia ban pynsted ïa ka jingpynbeit ïa ka jingïakajia halor ka jingïasam um jong ka wah Mahanadi hapdeng ka Odisha bad ka Chhattisgarh, ha kaba u Myntri ka tnat ki kam pohïing jong ka sorkar pdeng u Amit Shah un long u nongpynïaid ïa ka jingïalang bad ki Myntri Rangbah jong baroh ar tylli ki jylla ha ka 1 tarik u Risaw.
U Advocate General u Pitambar Acharya ha ka lah sngi U Blei u la ong ba kane ka jingïalang kan rah shakhmat ïa ki jingïakren halor ka jingïasam mar ryngkat ïa ka um Mahanadi hapdeng ka Odisha bad ka Chhattisgarh.
“U secretary ka Central Water Commission u la buh ïa ki jingtip ba bniah jong ki ar sien ïakren ba khatduh hakhmat ka Mahanadi Water Disputes Tribunal katkum ka jingbthah jong ka bad ka Tribunal ka la shim ïa ka ha ka rekod. Ki arngut ki Myntri Rangbah kin ïakynduh hapoh ka jingïalam jong u Myntri ka tnat ki kam pohïing jong ka sorkar pdeng. Ka Odisha ka la ïai ong ba ka jingïapher jingmut kan sa long lyngba ka jingïakren kaba da ka jingïasngewthuh jingmut,” la ong u Acharya.
Kane ka jingjia ka la jia tang hadien shi sngi hadien ba u Myntri Rangbah ka Chhattisgarh u Vishnu Deo Sai u la ïakynduh ïa u paralok jong u u Mohan Charan Majhi ha Bhubaneswar ha ka 20 tarik Nailur.
Kine ki arngut ki Myntri Rangbah ki la pynlong ïa ka jingïakren halor kane ka kam la palat shi kynta. Hadien ka jingïalang, u Sai u la ong ba kam don kano kano ka jingeh kaba khraw hapdeng ki ar tylli ki jylla halor ki um Mahanadi bad u la pynpaw ka jingshaniah ba katei ka jingeh kan sa lah ban pynbeit noh shen.
U la ong ruh ba ki Myntri Rangbah bad ki heh sorkar jong ka Odisha bad Chhattisgarh ki la pynlong ïa ka jingïakren kham mynshwa ha Delhi bad ki la mynjur ban pdiang ïa ki jingai jingmut jong ka CWC lada ki long kiba myntoi ïa baroh ar tylli ki jylla.
Kane ka jingïakajia halor ki um jong ka wah Mahanadi ka la sahkut hakhmat ka Tribunal naduh u snem 2018.
