Khliehriat, Risaw 05
Ka Diengchynrum SC ka la khur jingjop ha ka Super Division, katba ka Ladrymbai B SC bad Musniang SC ki la ïakhaid ha ka 1st Division ba la pynïaid da ka East Jaiñtia Hills District Football Association ha ka lah sngi U Blei ha madan Diengshynrum, Khliehriat.
Ha ka jingïalehkai Super Division (6th Kyrmen Shylla Contribution Trophy), ka Diengchynrum SC ka la pynliem noh ïa ka Rymbai Shkenshynriah SC da 2-1. Ïa kine la thep da u Th Aktar Hussain (38 & 81), katba ka Rymbai Shkenshynriah ka la thep kham hashwa da u Matthew Bareh (23).
Haba phai sha ka 1st Division (Thomas Nongtdu Memorial Trophy) hapdeng ka Ladrymbai B SC bad Musniang SC ki la ïakhaid mar 1-1 kol. tang mar ïasdang ka Ladrymbai ka la pynkhih jar nyngkong lyngba u Rimitre Lyngdoh (4), hynrei ka Musniang ka la pynïakhaid kylla da u Mardi Rymbai (70).
