Bengaluru, Risaw:
Ka Visvesvaraya Iron and Steel Plant ha Bhadravathi ka la ïoh ïa ka jingïohnong ha ki lai bnai lynter, kaba pyni ïa ka jingkiew ha ka rukom treikam ha ka liang ka pisa tyngka jong ka unit kaba la duhnong, ong u Myntri ka sorkar pdeng uba dei khmih ïa ka Steel u HD Kumaraswamy.
Ka karkhana ka la kamai T.33 lak ha u bnai Naitung, T.1.71 klur ha u Nailar bad T.1.96 klur ha u bnai Nailur, la ong ka kyrwoh khubor.
U la pynshong nongrim ïa ka jingbha ha ki jingpynkylla ba la leh hadien ba u la shimti ïa ka kam kum u Myntri ka Steel jong ka sorkar pdeng, ka jingbteng ban buddien bad ka jingleit jngoh man ka por ïa katei ka karkhana.
Ka jingpyntreikam kaba dang shen ka long kaba ai mynsiem bad ka pyni ïa ka jingaiti bad ka jingtreilang jong ki nongtrei, u la ong.
Ka jingmih jong ka VISL ka la kiew sha ka T.51.87 klur ha u bnai Nailur, haba ïanujor bad ka T.27.48 klur ha kajuh ka por jong u snem ba la dep.
Ka karkhana ka la mad ïa ka jingduhnong kaba T.3.78 klur ha u bnai Nailur, 2025. Ka jingduhnong kaba pura jong ka unit haduh u bnai Nailur 2026 ka long T.2.03 klur, ka jingkiew kaba khraw na ka jingduhnong kaba T.22.77 klur kaba la mad ïa ka jingduhnong ha kajuh ka por jong u snem ba la dep.
U Kumaraswamy u la ong ba ka jingpynbha kaba palat T.20 klur ka pyni ïa ka jingkiew kaba la leh ha kaba pynkhlaiñ ïa ka jinglong jingman ha ka liang ka pisa tyngka jong ka karkhana.
“Ka pyni ïa ka jingaiti bad ka jingtrei shitom jong ki nongtrei jong ngi. Nga ai khublei ïa ki nongtrei jong ngi bad ïa ka kynhun jong ka Plant baroh kawei na ka bynta kane ka jingtrei kaba ai mynsiem”, la ong u Kumaraswamy.
U la kyntu ïa ki nongtrei jong ka VISL ban pynneh ïa ka jingpyntreikam bad ban bteng ïa ki jingpyrshang ban pynbha ïa ka jingtreikam bad ban tei ïa ka lawei kaba khlaiñ bad kaba neh na ka bynta ka karkhana.
