Shillong, Risaw 16
U Myntri Rangbah ka jylla Meghalaya, u Conrad K. Sangma, hynne ka sngi Thohdieng u la plie paidbah ïa ka High-Performance Sports Science Centre ha Integrated Multipurpose Indoor Hall ha Shillong, na bynta ban ai jingpyntbit na ka bynta ki nongïalehkai, ki rukom bishar ha ka kam ïalehkai, bad ka jingkyrshan bniah sha ki nongïalehkai ka Jylla.
Ha katei ka sngi la donlang ruh ha ka ban plie paidbah da u Myntri jong ka Housing bad PHE, u Marcuise N. Marak, u nongjop takma ksiar ha Olympic u Abhinav Bindra, u Chief Secretary Dr. Shakil P. Ahammed, bad ka Secretary jong ka Sports & Youth Affairs Kong Isawanda Laloo, ryngkat bad kiwei ki riew pawkhmat, ki nongpyntbit, bad ki riewïalehkai.
Haba kren ha ka jingïalang, u Conrad Sangma u la ban jur ïa ka jingdonkam jong ka teknoloji bad ki rukom treikam ba thymmai ban lah ban ïalehkai bad ki riewïalehkai jong ka pyrthei. U la pynpaw ruh ïa ka jingthmu ban pyniar ïa kine ki jingpyntbit sha ki nongkyndong, da kaba pynbeit ban tei ïa ki centre ba ha kum kine ha Nongstoiñ, Jowai, Tura, bad Williamnagar, ryngkat bad ki centre platform jong ka phutbol bad ka centre pyntbit ha ki jaka ba kham shalor ki kyrdan ha Shillong.
