Nongstoiñ, Risaw 16
Ka kynhun ïalehkai jong ka New Nongstoiñ ha ka liang ki kynthei bad ka Pyndengrei ha ka liang ki shynrang ki la ïoh ban rah ïa ka nam lahduh ha ka lympung ïalehkai phutbol 2nd MLA Cup 2026 ïa kaba la pynlong da ka MLA Cup Football Tournament Committee.
Ka nam tam bad nam lahduh jong ka New Nongstoiñ, ha ka liang ki kynthei ka la wan hadien ba ka la lah ban pynliem noh da 2 kol la 0 ïa ka Pingbah ha ka jingïalehkai final pyrshah kaba la long ha ka sngi Thohdieng jong ka taïew ha madan New Nongstoiñ.
Katba ka nam tam bad nam lahduh jong ka Pyndengrei ha ka liang ki shynrang ka la wan hadien ba ka la lah ban pynliem noh da 4 kol la 3 ïa ka Mawlangdep lyngba ka tie breaker hadien ka jingïakhaid khlem da don mano mano ban ïoh thep ïa ka kol haduh ba kut noh jong ka jingïalehkai extra time ha ka jingïalehkai final ha kajuh kane ka sngi.
Ha kane ka sngi pynhap pyrda ïa kane ka lympung ïalehkai u Symbud Myntri Rangbah ka Jylla u Ma Sniawbhalang Dhar u la long u kongsan, katba u MLA ka Nongstoiñ u Bah Gabriel Wahlang u la long u symbud kongsan, ha ka jingdonlang ruh ki riewrangbah, u Sordar ka Shnong New Nongstoiñ u Bah Sraly Rashir ha kajuh ka por kum u MDC ka Mawshynrut, bad kiwei kiwei kiba la sam ruh ïa ki khusnam sha baroh ki team kiba la poi sha ka final, kumjuh ïa ki khusnam ba kyrpang.
