Shillong Risaw 18
Ka St. Joseph’s Church Mawkhar ka la pynlong ïa ka wat kaba ar jong ka Jubilee Marathon 2026 kum shi bynta ka jingrakhe ïa ka jingdap ba 75 snem jong ka Parish bad ïa kane ka Marathon la pynïaid da ka Sports and Cultural Committee.
Ïa kane ka marathon kaba la sdang ha ka step jong ka sngi Saitjaiñ na phyllaw jong ka Ïingmane ha kaba la plie bad kaweh lama da u Bah Mariahom Kharkrang, uwei na ki riew rangbah ba pawkhmat jong ka Parish bad hashwa ban kaweh lama la sdang shwa da ka jingduwai ba la ïalam da u Parish Priest u Rev. Fr. Leo Ïawbor, ha ka jingdonlang u Assistant Parish Priest u Rev. Fr. Bensar Kharsati nalor kiba ïashim bynta bad ki paid riewngeit jong ka Parish.
Ïa kane ka Jubilee Marathon la pynlong ha la ki jong ki kyrdan bapher bapher bad ki lynti mareh ki long ha la ki jong ki jingjngai kiba la sdang na St. Joseph’s Church Mawkhar- Motphran – Bhutia Market – Khyndai lad – Salonsar Building – English Service – State Bank – Governor’s House – Lake – BJP’s Office – CM’s House – Polo Towers – Polo Traffic Point – Lad Lawmali – Wahingdoh Bridge – MIMHANS – Jingthangbriew – St. Joseph’s School – Mawbynna – Chappel Road – Robert Hospital – Mawkhar Community Hall bad ban pynkut St. Joseph’s Church Mawkhar.
Ïa ka nam nongjop ha ka Category-A (11-14 snem ki kynthei) la rah da ka Felicia Marngar, ba-ar ka Rafilia Malngiang, katba ïa ka kyrdan balai la jop da ka Lianarica Dkhar & Rofina Malngiang. Katba ha ka liang ki shynrang la jop da u Rafael C. Khongthaw, ba-ar u Leoneldo Wahlang bad balai u Damian B. Sun.
Ha ka Category-B (15-25 snem kynthei) la jop da ka Ibawanjanai Jyrwa, ba-ar ka Ri-ia-ka Wahlang bad balai ka Jingkmen Dkhar. Ha ka liang ki shynrang la jop da u Elbin Lyngdoh, ba-ar u Nathaniel Malngiang bad balai u Wanlambok Nongrum.
Haba phai sha ka Category-C (26-35 snem kynthei) la khur jingjop da ka Diangti Mery Marweiñ, ba-ar ka Ibalawanri Marweiñ bad balai ka 3rd – Vanti M. Marngar. Katba ha ka liang ki shynrang la jop da u Anandis Blah, ba-ar u Jonest Thabah bad balai u Mark B. Thabah.
Ha katei ka sngi la sam ruh ïa ki syrnod sha baroh kiba la shim bynta ha kane ka Jubilee Marathon bad la sam ruh da ki medal bad certificate sha baroh ki nongjop ha kane ka sngi da ki kongsan bad kiba la shah khot sngewbha.
Kane ka jingpynlong kane ka Marathon ka long ruh ban pynshlur ïa ki khynnah, ki samla bad ïa baroh ba ki dei ban ong em ïa u drok bad ïa ka jingpang AIDS bad u khñiang jingpang HIV kiba la kynrei ha kane ka Jylla.
Ïa kane ka jingmareh Marathon la pynïaid lyngba ki house bapher bapher bad la pynkut ruh hapoh phyllaw jong ka Parish Mawkhar.
