Shillong, Risaw 18
Ka Nongkrem bad ka Mawkhar ki la long ba la pynkhreh ban ïaknieh ïa ka nam lahduh ha ka First Division Football League ba la pynïaid da ka Shillong Sports Association, ka ban long mynta ka lah sngi U Blei ha SSA Stadium, Polo ha ka por 2:30 nohphai sngi.
Kine ki kynhun ki la kiew kyrdan biang sha ka Shillong Premier League ka ban long ha u snem ban wan.
Kane ka long hadien hynñiew ïa ka Mawkhar ba kan wanphai biang sha ka SPL naduh ba ka la ïalehkai khatduh ha u snem 2019, katba kan dei hadien 11 snem ïa ka Nongkrem ba kan wanphai biang sha katei ka lympung naduh ba la ïalehkai khatduh ha u snem 2016. Te kumta ka rai ban khur ïa ka nam lahduh kan shong mynta ka lah sngi U Blei bad mano ban rah ïa ka trophy nam lahduh.
Lah ban kdew ha ki jingïakhun semi final ba la lah, ka Nongkrem ka la pynliem ïa ka Mylliem Lum da 2-0 kol bad ka Mawkhar ka la jop ïa ka Malki da 2-1 kol.
Te kumta hashwa ba ka Nongkrem bad ka Mawkhar kin kiew kyrdan sha ka SPL, kin pynkhreh ban ïakhun shwa ïa ka SSA Champions Cup ka ban long ha u bnai ban wan. Ki kynhun ki ban ïakhun ha kane ka lympung kin dei tang kiba khur nam lahduh bad ba wan ba-ar naduh ka SPL, First, Second, Third bad Fourth Division ki ban ïashim bynta.
