Shillong, Risaw 18
Ka Nongkseh kan ïakynduh pyrshah ïa ka Meghalaya Police kan ïakynduh biang ha ka sien kaba lai ha ki 12 bnai na ka bynta ban ïaknieh ïa ka nam lahduh ha ka final jong ka SSA Super Cup 2026 ha ka por 5:30 janmiet.
Baroh ar kine ki kynhun ki la ïoh rung sha ka Super Cup hadien ba ki la wan ha ka thup kaba hynriew (Top 6) jong ka Shillong Premier League 2026, ha kaba ka Nongkseh ka la wan balai bad ka MLP ka la wan basan. Te kumta baroh ar tylli ki la hap ban ïakhun shwa ïa ka playoffs hashwa ba kin jam sha ka semi final bad mynta kin pynkhreh ban ïaknieh ïa ka nam lahduh.
Kumba ka paw ka Nongkseh ka la jop ha ka playoff ïa ka Sawmer da 4-2 kol bad ha ka semi final ka la lah ban pynliem ïa ka lahduh jong ka SPL 2026 ka Mawlai da 1-0 kol. Katba ka MLP ka la lah ban pynliem ïa ka Langsning ha ka playoff lyngba ka tie-breaker da 5-4 kol bad ha ka sngi Saitjaiñ ka la jop da 1-0 kol ïa ka Shillong Lajong, kaba la wan ba-ar ha ka SPL 2026 bad kaba long ruh ka lahduh ha ka Super Cup 2025.
Kumba ka paw na ki jingïalehkai ba la lah, ka Nongkseh ka la long ka kynhun kaba kham biang ban ïa ka MLP, hynrei ka rai ban rah ïa ka nam lahduh kan shong hi ha kane ka jingïakhun final.
Lah ban kdew ha u snem ba la lah, kitei ki kynhun ki la ïalehkai ha ka First Division 2025 jong ka Shillong Sports Association. Kine ki kynhun ki la ïakynduh teng ha ka final bad ka Nongkseh ka la jop da 1-0 kol. Ha kane ka SPL mynta u snem, ka Nongkseh kam shym la lah ban khur jingjop ha ki lai tylli jingïakhun hashwa ba kan ïakynduh ïa ka MLP bad ka la lah ban jop da 7-1 kol.
Kumba ka paw ka MLP kam dei shuh ka kynhun kaba dangdon ha ka rukom ïalehkai namar dangshen ka la lah ban pynliem ïa ki kynhun ba khlaiñ bor kum ïa ka Langsning bad ka Lajong. Mynta kane ka kynhun ka don ïa ka jingsngewskhem ba kan lah ban leh eiei ha kane ka jingïakhun final. Te kumta ka Nongkseh kan hap ban long kaba phikir bha ïalade khnang ba kan lah ban pynurlong ïa ka jingangnud jong ka.
