Shillong, Risaw 18
Hadien 30 snem ka Jylla ka la wanphai biang ba kan pynlong ïa 5th ka KIO North East Zone Karate Championship 2026 bad na ka liang ka All Meghalaya Karate-Do Association (AMKA) ka la ïaid shakhmat ïa ka jingpynkhreh ïa kane ka lympung.
Kin don kumba 900 ngut ki nongïalehkai karate lem bad ki nongpynïaid ki ban wan ïashim bynta sha kane ka lympung, ka ban sdang naduh 22 haduh 24 tarik mynta u bnai Risaw 2026, ha NEHU Convocation Hall.
Ïa kane ka lympung yn pynlong hapoh ka jingkhmih da ka Karate India Organisation ïa kaba la ïarap ban bei pisa da ka tnat ïalekai ka Sorkar Jylla.
Haba ïadei bad kane, ki nongïalam ka AMKA lem bad ki dkhot jong ka, ki la pynlong ïa ka jingïakynduh lang bad ki nongthoh khubor ha ka sngi Saitjaiñ, ha kaba la don lang naduh u President u Bah Hunlang Lyntan, u Secretary Bah Ksankupar Warjri, nangta ki arngut ki Patron Bah Ransom Sutnga bad Bah Aiborlang Shabong lem bad u Coach ka kynhun u Bah Donboklang Lyngdoh.
Ha kane ka lympung, ka Jylla kan sei kumba 296 ngut ki nongïalehkai bad bynrap lang bad na ki 6 tylli kiwei pat ki jylla ka thaiñ shatei lam mihngi ka ri, lait noh ka Mizoram kaba la pyntip ba kan nym lah ban wan ïashim bynta sha kane ka lympung.
Nalor ki nongïalehkai, ka AMKA ka la pynbna ruh ïa u Mingson Rymbai bad u Arjun Sewa, kin long ki head coach, katba ka Wandashisha Warjri bad u Ronald L Nonglait kin shim ïa ka bynta kum ki assistant coach, team manager ka Laiarisa Nongrum, Beautiful Mary Mylliem, Rose Mary Tympuiñ, Junita Rani bad Aihunlang Makdoh, katba ka Sharailang Nongneng Shanpru yn dei physiotherapist jong ka kynhun.
Ki jingïakhun jong kane ka lympung kin long ha ka 23 bad ka 24 tarik, katba ka sngi ba nyngkong , kata ka 22 tarik pat kan dei ka KIO Referee & Coaches Seminar & Examination, kaba hangne na ka liang ka Meghalaya yn ïashim bynta da kumba 21 ngut, ban nongpynïaid ïa kane un dei u Premjit Sen, Chairman ka KIO’s Referee Commission.
Ka jingïalang plie pyrda ïa kane ka lympung kan long ha ka 23 tarik u Risaw ban wan plie ïa ka da u Myntri ba dei khmih ïa ka tnat ïalehkai Bah Wailadmiki Shylla, katba u symbud kongsan un dei u Director ka tnat ïalehkai Bah Alertson Nongbri bad u Bharat Sharma uba dei u President ka KIO.
