Jowai, Risaw 20
Ka Larnai Lurshai ka la pynliem ïa ka Nongkhroh Rim da 2-0 kol na ka bynta ban khur jingjop ha ka Super Division Football League ba la pynïaid da ka Thadlaskeiñ Sports Association (TSA) ha ka sngi Ba-ar ha Multi Sports Complex kaba ha Wahïajer.
Ha kane ka jingïakhun ka Larnai ka la lah ban ïalehkai bha naduh kaba sdang ha kaba ka la ïoh ban thep ar kol ha ka kylla step lyngba u Iaidon Shadap ha ka minit kaba 32 bad u Enforce Kharsohnoh (40).
Haba phai sha ka kyrdan ïalehkai 1st Division, hapdeng ka Jalapang SC bad Tyrshang SC ki la ïakhaid mar 1-1 kol. Ïa ka kol na ka bynta ka Jalapang la thep da u Chelang Laloo (38), hynrei ka Tyrshang ka la pynphai kylla lyngba u Kyrsiew Suting (49).
