Shillong, Risaw 20
Ka Mawkyrwat District Sports Association (MDSA) ha ka sngi Balang jong ka taïew ba la lah, ka la pynlong ïa ka prokram pynkup burom ryngkat ka jingkitbok kitrwiang ïa ka Jakrem Sports Club hashwa ban kan leit ïashim bynta ha ka Women’s League II, ka ban long ha SSA Stadium, Shillong.
Ka Jakrem SC, kaba long ka lahduh jong ka Meghalaya Women State League 2025, kan sa ïakhun na ka Group-C pyrshah ïa ka Kemp FC, Mumbai Knights FC bad AIFF TDS FA.
Kane ka kynhun kan ïakhun nyngkong pyrshah ïa ka AIFF TDS FA ha ka 25 tarik mynta u bnai, ha kaba yn pynbud pat sa ka jingïakhun pyrshah ïa ka Kemp FC ha ka 27 tarik bad ïa ka Mumbai Knights FC ha ka 29 tarik.
Ka Deputy Commissioner ka South West Khasi Hills kaba long ruh ka President ka MDSA, ka Kong A.L. Mawlong ka la pynpaw ïa ka jingsngew sarong halor ka jingïoh jong ka kynhun ban shim bynta ha katei ka lympung bad kitbok ïa ki nongïalehkai ba kin wanrah jingjop ïa ka Jylla.
