Amlarem, Risaw 20
Ka Lumpyngngad FC bad Amlarem ki la ïasam mar shi poiñ ha ka lympung ïalehkai Super Division Football League ba la pynïaid da ka Amlarem Sub-Divisional Sports Association (ASSA) ha ka sngi Ba-ar ha Mini Stadium Ladjaplem.
Ha kane ka kyrdan ïakhun, ka Lumpyngngad FC bad ka Amlarem ki la ïakhaid mar 2-2 kol. Ïa ki kol na ka Lumpyngngad la thep da u Alphaios Pamblang (5 & 65), bad ïa ka Amlarem la thep da u Passki Nongrum (29 & 39).
Haba phai sha ka Third Division, hapdeng ka DK. Umladkhur bad Lurning ki la ïasam mar shi poiñ hadien ba kim shym la lah ban thep kol haduh kaba kut ka jingïalehkai.
Ha kawei pat ka jingïalehkai kaba bud, ka Kharkhana Tyllilang SC ka la jop da 1-0 kol ïa ka Syndai Kmaishnong bad ïa kane la thep da u Aibormi Kongwang (45).
Katba ka Ammutong Cultural ka la pynliem da 4-0 kol ïa ka Sohkha Shnong. Ïa kiba la thep da u Pynskhem Dhar (7), Kermi Ngalang (40) bad u Pyntngen Pohsngap (42 & 47).
