Agartala, Naiwieng:
Ka jingtohkit ïa ki 10 ngut kiba la shahkem hadien ka jingthombor ïa ki shipai BSF ka dang ïai bteng haduh ba la thoh ïa ka khubor.
Kumba ka la jia, la ong ba ki la don kumba shiphew ngut ki briew ba kynthup ïa lai ngut ki kynthei kiba la shah kem halor ka jingkynnoh ba ki la thombor ïa ki shipai BSF bad pyrshang ban knieh ïa ki tiar siat jong ki ha ka shnong Ashabari kaba don ha Sepahlijala distrik harud khappud India bad Bangladesh jong ka Tripura
Kumba la ïathuh ka tyllong khubor la ong ba ki la don lai ngut ki shipai BSF kiba la shah pynmynsaw kynthup u Company Commander.
Ka tyllong khubor kaba la wan na ki pulit ka la ïathuh ba katei ka jingjia ka la jia ha ka por ba pakhang surok da ki nongshong shnong kiba pyrshah ïa ka jingkynnoh ba la thombor ïa uwei u nongshong shnong ha katei ka jaka da ki shipai BSF kiba la suba ba ki donkti ha ka kam khaïi beaiñ.
Ka jingïakynad ka la nangjur shuh shuh haba kawei ka kali kaba kit ïa kitei ki lai ngut ki shipai BSF ka la poi ha katei ka jaka ba la khang pyrshah. La kynnoh ba ki paidbah ki la thombor ïa ki nongshong kali da ki dieng bad ki dieng siej.
Ïa kine ki shiphew ngut kiba la shah kem, la ïalam hakhmat ka ïingbishar ha ka sngi Ba-ar. Ka kashari ka la pynngat ïa kitei ki hynñiew ngut ki shynrang kiba shah kynnoh ha phatok pulit haduh saw sngi, katba ïa ki lai ngut ki kynthei la phah set phatok ïa ki 10 sngi, la ïathuh ki heh pulit.
U Myntri Rangbah ka jylla u Dr Manik Saha u la pynrem jur ïa kane ka jingshah thombor ha ka jingthoh ha ka Social Media da kaba ong ba ka jingleh donbor pyrshah ïa ki bor pahara kam long kaba lah ban pdiang bad dawa ban leh da kaba tyngeh ïa kiba donkti.
“Nga da pynrem jur ïa ka jingshah thombor beiñ jong ki shipai BSF ba shlur jong ngi ha Ashabari da ka kynhun ki riew bymman. Kum kine ki kam thombor pyrshah ïa ki bor pahara jong ngi ki long ki bym lah ban pdiang satia bad ki dei hok ban ïoh ïa ka jingpynrem kaba khlem jingartatien. Kano kano ka jingthombor ïa ki shipai pahara jong ngi ka dei ka kam kaba sngewkhia bha bad dei ban leh katkum ka aiñ.”
U la bynrap, “La bthah ïa ki bor ba dei peit ba kin pynstet bad ai da kaba tyngeh pyrshah ïa kito kiba donkti bad ban pynthikna ba yn pynïoh ïa ka hok. Ki bor pahara jong ngi ki dei hok ban ïoh ïa ka jingburom bad jingïada kaba khraw tam.”
Ha kajuh ka por, ki pulit ki la buh jingthoh halor ki jingujor na baroh ar ki shipai BSF bad na ki trai shnong trai shnong ha Kalamchoura police station ha kaba ïadei bad ka jingjia.
Haba kren ha ki nongthoh khubor, u ophisar pulit ka Sonamura Sub-Divisional Police (SDPO) u Abhijit Das, u la ïathuh ba ki heh pulit kynthup ïa u Additional Superintendent of Police ki la leit ban jurip ïa katei ka jaka bad bishar bniah ïa ka jinglong jingman.
“Ngi la leit jngoh ïa katei ka jaka ryngkat bad ki ophisar jong ka thanat. Kane ka kam ka dang don ha ka jingtohkit, bad ngin shim ïa ki sienjam baroh kum shi bynta jong ka jingtohkit. Ki briew kiba mynsaw ki don ha hospital,” la ong u Das.
Ki pulit ki la ïathuh ba ka jingtohkit ka dang ïaid shakhmat ban pynthikna ïa ka jingbud ryntih jong ki jingjia bad ban ithuh ïa baroh kiba donkti ha katei ka kam thombor.
La ïathuh ba ka jinglong jingman ha Ashabari, ka la don hapoh ka jingpynïaid, wat haba ki pulit ki dang bteng ïa ka jingtohkit jong ki.
