Imphal, Naiwieng:
Ka sorkar Manipur ka la thaw ïa ki District-Level Peace Committee ha baroh ki 16 tylli ki distrik ban pynkhlaiñ ïa ki jingpyrshang ban tei ïa ka jingsuk lyngba ka jingïakren kaba ïaineh, ka jingïatreilang bad ki paidbah bad ki lad ban pynïoh ïa ka jingshaniah, katkum ka hukum ba la pynmih da ka sorkar.
Ka hukum kaba la pynmih da ka tnad kam pohïing ha ka 30 tarik u Risaw bad kaba la ïasam sha ki lad pathai khubor ha ka sngi Ba-ar, ka la ong ba ïa kane ka rai la shim da kaba pyrkhat ïa ka jinglong jingman jong ka suk ka saiñ kaba don mynta ha ka jylla.
Kine ki komiti kin treikam hapoh ka jingpynïaid jong ki District Magistrate bapher bapher bad kin don 11 ngut ki dkhot kawei kawei. Ki dkhot jong ki kin kynthup ïa u Superintendent of Police, ki Sub-Divisional Officer (SDO), ki Sub-Deputy Collector (SDC) bad ki ophisar ba hakhliehduh jong ka distrik na ki tnad ba dei peit.
Ki nongmihkhmat jong ki jaitbynriew bapher bapher kiba shong ba sah ha man la ki distrik, kynthup ïa ki nongïalam jaitbynriew, ki seng bhalang (CSO), ki seng treimon sngewbha (NGO), ki lad pathai khubor bad ki nongthoh khubor na ka thaiñ, kumjuh ruh ki ophisar bad ki nongtrei sorkar kiba la shongthait, kin long ruh shi bynta jong ki komiti.
Katkum ka hukum, ki komiti kin long kum ki rynsan ban ïakren man ka por bad ki nongïalam shnong bad kiwei kiwei ki nongshim bynta ban kyntiew ïa ka jingïasngewthuh jingmut, ban weng ïa ki jingeh, ban ïada na ka jingjur jong ki jingïakynad bad ban pynsuk ïa ka jingpynphai biang ïa ka jingsuk bad ka jinglong jingman.
Kin ïakynduh man ka por bad ki nongïalam shnong, ki CSO, ki seng treimon sngewbha bad ki paidbah ban ïakren ïa ki jingthmu ban tei ïa ka jingsuk, ban ithuh ïa ki jingeh bad ban kyntiew ïa ka jingshaniah para ma ki.
Ki komiti kin ai jingmut bad pynsuk ruh ïa ki lad ban pynskhem ïa ka jingshaniah, pynshlur ïa ka jingïakren hapdeng ki distrik, khamtam ha ki jaka ba shah ktah ha ka jingeh ne jingïaleh, bad ïarap ban pynbeit ïa ki jingbym ïasngewthuh jingmut shwa ba kin nang jur.
La bthah ïa ki ban wad ïa ki jingeh kiba mih, ki jingsngewsih, ki khubor lamler bad kiwei kiwei ki jingma kiba lah ban pynmih ïa ka jingïaleh bad ban wanrah kloi ïa ki sha ka jingtip jong ka bor synshar distrik ban wanrah ïa ki lad jingïada.
Ki komiti kin ai jingmut ruh ïa ki lad ki lynti ban pynthikna ïa ka jingleit jingwan jong ki briew kaba suk, ban pynphai biang ïa ki jingshakri kiba kongsan bad ban sdang biang ïa ki kam imlang sahlang kiba man ka sngi, ha kano kano ka jaka kaba lah.
Kin ïatreilang bad ki bor pulit, ki bor synshar distrik bad kiwei kiwei ki tnad ban pynthikna ba kin leh ha ka por kaba biang halor ki mat kiba ktah ïa ka suk ka saiñ, katba ki dang pynthikna ba baroh ki lad ki lynti kin sah hapoh ka kyndon jong ka aiñ.
Ka hukum ka la ong ba kawei pa kawei ka komiti ka dei ban ïakynduh la kumno kumno shisien man la ka ar taïew, lane kham bunsien katkum ka jinglong jingman kaba don mynta. Ki komiti kin treikam kum ki kynhun ba ai jingmut bad pynsuk.
