Guwahati, Naiwieng:
Ka Assam Drugs Control Administration ka la bthah ïa baroh ki nong-khaïi, ki nongsam dawai, ki nongdie dawai ha ki dukan dawai bad ki hospital ha kylleng ka jylla ban die ïa ki 137 tylli ki dawai kiba khlem buh por na ka bynta ka jingpang cancer ha ka dor ba la pynkylla, ba la pynduna dor katkum ka Maximum Retail Prices (MRP) naduh ka 9 tarik u Naiwieng.
Ha ka jingpynbna ba la pynmih ha ka lah sngi U Blei, ka bor synshar ka la maham ba yn pynlong ïa ka jingjurip ha baroh kawei ka jylla kaba 90 sngi ban pynthikna ïa ka jingbud ryntih ïa ki kyndon buh dor ba la pynkylla. Kane ka jingbthah ka long hadien ka jingpynbna ha ka Gazette ba la pynmih da ka National Pharmaceutical Pricing Authority (NPPA) ha ka 17 tarik u Risaw, kaba la buh kyndon ïa ka khaïi pateng halor ki dawai ba la ithuh haduh 30 percent na ka MRP jong ki.
Ka NPPA ka la pyndonkam ïa ka Paragraph 19 jong ka Drugs (Prices Control) Order, 2013,kaba ai bor ïa u nongpynïaid ban tuklar na ka bynta ka jingmyntoi jong ki paidbah.
Ka jingbuh dor ka treikam na ka bynta ki dawai bym shym la buh por kiba don ïa ki dawai ba la buh kyrteng, la ka long kum ki dawai ba shijait ne ha ka jingpynïasoh lang bad kiwei pat ki jait dawai. Ka kynthup ruh ïa ki dawai kiba ki dei ban ai sha ki nongpang. Hapoh ka jingbthah jong ka sorkar Assam, la bthah ïa ki dukan die dawai, ki jaka die dawai ha ki hospital, ki nongdie bad ki nongsam dawai ba kin pyni shai bha ïa ki dor ba la pynkylla ha ki jaka jong ki, katkum ka Paragraph 25(3) jong ka hukum jong u snem 2013.
Ka bor synshar ka la maham ba ki jaka ba lap ba ki die ïa ki dawai kiba palat ïa ka MRP ba la pynkylla kin mad ïa ka jingshah pynshitom katkum ka Drugs (Prices Control) Order and the Essential Commodities Act, 1955.
