London, Naiwieng:
Uwei u rangbah uba 31 snem ka rta u la shah ialam ha khmat ka iingbishar ha ka Sngi Nyngkong hadien ba la pynngat ïa u hapoh ki kyndon pynkheiñ aiñ jong ka jingpyniap ïa kawei ka kynthei kaba 26 snem ka rta kaba dei ka nong India bad ba la lap ba ka don ïa ki dak mynsaw kuli hadien ba la shem ïa ka na kawei ka ïing kaba don ha ka thaiñ Sepngi jong ka London bad la pynbna ba ka la iap ha katei ka jaka ha ka taiew ba la dep.
Ki Pulit ka Metropolitan ki ïathuh ba ïa katei ka samla la lap hadien ba la leh ïa ka “Welfare Check” ha surok Chertsey ha Hounslow bad hadien la ithuh ïa ka kum ka Navneet Kaur. U Rajat Jaswel, uba dei ruh u nong India, u la shah kem tang hadien katto katne por bad u la leit hajir ha Hendon Magistrates’ Court halor ka jingshah kynnoh halor ka jingpyniap briew bad ka jingdon suloi da ka jingthmu ban buh jingma ïa ka jingim.
“Ka jingsngewlem jongngi, kan long ryngkat bad kiba haïing bad kiba ieid jong ka Navneet katba ki dang ïai bteng ban ïakhun pyrshah ïa kane ka jingduh kaba shyrkhei,” la ong ka Detective Chief Inspector (DCI), ka Sarah Lee, kaba lam khmat ïa katei ka jingtohkit.
“La pynngat ïa uwei u briew hynrei ka jingtohkit jong ngi ka dang iaid shakhmat bad ngi dang kwah ban iohsngew na kino kino kiba lah ban don jingtip kiba lah ban iarap,” ka la ong.
Ki pulit ki la kyrpad ïa ki jingtip, khamtam eh ïa ki dur ba la shon na ki jingkhang ne dashcam na katei ka jaka, ban iarap ha ka jingtohkit jong ki.
“Ha ka janmiet jong ka sngi Thohdieng, 4 tarik u Naiwieng, ki ophisar ki la leit sha kawei ka jaka sah ha ka surok Chertsey ban pynlong ïa ka jingpeit bniah ïa ka bha ka miat,” la ïathuh ki pulit.
