United States, Rymphang:
Katkum ka khubor ba lah ioh lum ka iathuh ba ia ka jainphong ialehkai (Jersey) kaba ju phong baroh shi katta da u nongialehkai Basketball ba pawnam ka USA u Kobe Bryant; uba lah khlad noh lai snem mynshuwa na ka jinghap ka liengsuin-shimet (Helicopter), la ong ba ia katei ka jain lah die lilam noh ha ka dor $5.8 million.
Shuh shuh ha kaba iadei bad katei ka bynta, ka jingdie ia katei ka jainphong jong utei u khlur ialehkai da ka kompani Sotheby ha New York ka lah thaw ruh ia ka rekod ba thymmai na ka bynta kano kano ka tiar ba ju pyndonkam da u Bryant ha kata ka iew die lilam, hynrei kaba lah wan mynta hapoh kata ka Upper Pre-sale Estimate kaba $7 million.
Kumta ka dor ka long kaba lah arshah ban ia kaba ha shuwa ha ka jingkiew kaba lah kot sha ka $3.7 million ia kaba lah siew na ka bynta katei ka jain ialehkai ba lah ju iai phong da utei u khlur ialehkai ka LA Lakers; uba lah rah ia ka nam jingjop haduh san sien ha ka NBA bad ar tylli ka takma Ksiar.
Kumjuh ruh ka jainphong ialehkai jong u Michael Jordan uba lah phong ha ka jingiakhun phainal ha u snem 1998 ha ka lympung ialehkai NBA ia kaba la lah ban die ha ka dor $10.1 million ha u Nailur 2022, haduh mynta ka dang iai bat kum kata ka tiar pyndonkam kaba rem dor tam eh ka jong u napdeng kiwei pat ki tiar ia kaba lah die lilam. Ia ka jainphong ialehkai jong u khlur ialehkai phutbol barim ka Argentina u Diego Maradona, la lah ban die ia ka ha ka dor $9.3 million ha ka Sotheby ha u snem ba lah dep.
Kumta ruh ka jainphong ialehkai jong u Bryant kaba don ia ka rong stem thoh purple ia kaba lah thoh ruh ia u nombar 24 kum u nombar ba donbok na ka bynta jong u, lah die noh ia ka da u trai jong katei ka kompani, hadien ba lah phong ia ka da utei u khlur ialehkai ba pawnam ka LA Laker ha ki 25 tylli ki jingialehkai ha ka por jong ka aiom ialehkai 2007-2008. Ka sien kaba khatduh ha kaba lah die paidbah ia katei ka jainphong ialehkai ka jong u ka long ha u snem 2013, ha kaba katei ka jain ka la lah ban khyllie dor tang haduh $18,678.
