Shillong, Ïaïong 03
Ka jingpynlong ïa ka jingïakop ñiah lieng ba la tip kum ka 1st Indian Sailing League (ISL) ka la long kaba seisoh hadien ba ka la poi sha kaba kut ha ka Orchid Sports Complex, Umiam ha kaba la wan shim bynta da 182 ngut ki nongshim bynta, kynthup ïa 58 ngut kiba na Russia, Korea, Taiwan, Hong Kong, Malaysia bad Sri Lanka.
Ha kane ka jingïakop kaba san sngi kynthih, ka Bhopal Tritons ka la long ka nongjop, katba ka AJ’s Vizag Viking ka la wan ha ka kyrdan kaba ar bad ka Shillong Umïam Navigators (SUN) ka la wan ha ka kyrdan balai. Ka Deccan Skippers, VIR Cholas, bad Pune Peshwas ki la ïoh ban bat ïa ka kyrdan kaba saw, kaba san bad hynriew.
Lait na ka khusnam lahduh, ki khusnam kiba la pynlut ha kane ka jingïakop ki long haduh T. 1.5 klur sha ki kynhun bad ki nongjop shimet ha la ki jong ki kyrdan bapher-bapher.
U Chaitanya Awasthi (IAS), Sub-Divisional Officer jong ka Ri-Bhoi District, u la ïaroh ïa ki sap ba kyrpang, ka jingshlur ha ka jingïakop, bad ka jingïalehkai kaba ki la lah ban pyni ha ka pung Umïam. U la ai khublei ïa ki bor pynïaid kiba la lah ban pynurlong bad ka jingthmu ban pynïaid beit ïa kane ka jingïakop da kaba kdew ba ka jingïatreilang jong ki ban kyntiew ha kane ka jingïakop bad kyrmen skhem ba ki nongshim bynta kin sa lah ban mih madan ha ka Olympic.
U la pynkynmaw ïa ki nongïashim bynta ba ka jinglah ban ïakhun bad ka jingkut jingmut ki dei ki mawjam ba kongsan tam jong ka jingjop.
U Admiral Karambir Singh, PVSM, AVSM, ADC (retd), uba long u khliehduh barim ka kynhun shipai duriaw bad uba long ruh u President ka Yachting Association of India, u la ïaroh ïa ka jinglah ban pynlong ïa kane ka jingïakop kaba jop. U la pynpaw ka jingsngewnguh ïa ka Sorkar Jylla hapoh ka jingïalam u Myntri Rangbah, bad ki heh Sorkar. “Ka jingkyrshan ba pura kaba ka Sorkar Jylla ka la ai na ka bynta kane ka jingïakop, ngam pat ïohi ba kiwei pat ki Sorkar Jylla kin leh”.
U la pynpaw ïa ka jingthmu ba lai bynta jong ka Yachting Association of India (YAI) ban kyntiew ïa ki sap naduh dangrit, ban pynïoh takma ha ki jingïakop ki ban long shabar ri, bad ban kyntiew ïa kane ka jingïalehkai.
U Alok Kumar Yadav, League Commissioner ka ISL, u la pynpaw ïa ka jingïatreilang da baroh ban kyntiew ïa kane ka jingïalehkai bad u la pynksan ïa ki jingpyrshang jong ka synjuk ban pynïaid beit ïa kane ka jingïakop. U la pynpaw ruh ka jingkyrmen ba ka jingjop jong ka jingïakop kan plie lad ïa ka samoi kaba ar ba kan long kaba nangkham itynnad shuh shuh.
