Chennai, Rymphang:
Katkum ka khubor ba lah ioh lum ka iathuh ba kawei na ki khlur ialehkai Tennis ka ri India ka Sania Mirza ka lah pdiang bad dap ruh ka jingkyndit kaba khraw hadien ba ka lah shah tyrwa kam ha kawei na ki kynhun ialehkai Kriket jong ka lympung ialehkai ki kynthei ka Royal Challengers Bangalore; na ka bynta ba kan long ka Mentor iakatei ka kynhun ialehkai ka ban sashimi bynta ha ka lympung ialehkai ba nyngkongeh jong ki kynthei ka Women’s Premier League.
Kumta katei ka nongialehkai Tennis ba paw ka ri kaba lah khuria ka jingjop Grand Slam haduh hynriew sien, dang shen ka lah pynbna ba kan shongthait noh na ka kam ialehkai Tennis ka jong ka hadien ba ka lah dep ban khuria ki 43 tylli ki trophy jingjop ha ka WTA.Kumta na ka liang jong katei ka nongialehkai ka pynpaw ba ka sngi myn taba ka tei ka kam shakri kaba hadien lait noh na ka kam ialehkai ka jong ka, ka long ban pyrshang bad ban iarap ruh ia ki thei ialehkai kiba dang khie-dang san kiba don ka jingngeit kaba skhem ba ka kam ialehkai ka long kawei na ki kam shakri ba hakhmat eh ha ka jingim jong ki. Kum ban shu pynkynmaw biang hangne ba ha ka iew thied nongialehkai na ka bynta katei ka lympung, ka RCB ka lah ioh ban thied sha lade ia ka khlur ialehkai Kriket ka India ka Smriti Mandhana,ia ka nongialehkai ba paw ka Australia ka Ellyse Perry, ka nongkawang bol ka Aus ka Megan Schutt,kapten ka New Zealand ka Sophie Devine,kapten ka England ka Heather Knight, ka nongialehkai na South Africa ka Dane Van Niekerk bad ia ka nongialehkai ka India na ka kyrdan U-19 ka Richa Ghosh.
