London, Rymphang:
Ha ka thup kyrdan bathymmai jong ka ICC kaba lah pynmih ha kaba iadei bad ki rangkawangbol ha ka jingialehkai Test, ka khubor ka iathuh ba uwei na ki nongkawangbol spin jong ka kynhun ialehkai Kriket ka India u Ravichandran Ashwin u lahioh ban kiew mynta sha ka kyrdan ba 2, hadien ki 8 wiket kiba u la lah ban pynioh sha ka kynhun ha ka jingiakhun Test ba nyngkong pyrshah ia ka Australia ha Nagpur.
Shuh shuh ruh uwei pat u rangkawangbol spin ka kynhun u Ravindra Jadeja; uba lah seisoh ha ka jingwan phai biang ka jong u sha ka kam ialehkai hadien katto katne bnai ba lah iehnoh na ka dawjong ka jingmynsaw, u lah kiew mynta sha ka kyrdan ba 16 ia kaba lah bud hadien ba u lah khur ia ka nam ‘Player-of-the-Match’ ha ka jinglah jong u ban kamai iakatei ka khusnam na ka jingialehkai ha ka lympung Border-Gavaskar Trophy.Kumta ruh kitei ki arngut ki rangkawangbol spin ki lah iai beh thong ia ka Australia ha ka jingiakhun test ba nyngkong hapdeng jong ki da kaba iasam mar 15 wiket bad pynlong ia ka India ban rah ia ka thong jingjop da ki innings bad 132 ron hapoh ki lai sngi iakhun.Naba u Ashwin u kiew kyrdan mynta ia kaba lah niew kum ka jingphai biang sha ka kam jingseisoh na ka aiom ialehkai ba lah dep, u Jadeja u lah pynsniew dur noh ha ka sngi ialehkai ba nyngkong da 5 wiket ha ki 47 ron,kynthup ia ki khusnam wiket jong u Steve Smith bad Marnus Labuschagne.Kumta u Jadeja u lah khur ia ki 2/34 ha ka jingiakhun ka baar bad ka Australia ha kaba katei ka kynhun iakhun pyrshah ka lah shah pynhap wiket baroh ki nongtied jong ka tang da 91ron.
Napdeng kiwei pat ki nongkawangbol ka India, u Jasprit Bumrah u bym shym la ioh ban ialehkai shuh naduh u bnai Nailur namar ki jingmynsaw, u lah shah buh mynta ha ka kyrdan ba 5. Ha ka thup kyrdan jong ki nongtied ha ka jingialehkai Test, u kapten ka India u Rohit Sharma u lah ioh ia ka bainong bakhraw halor ka jinglah jong u ban kamai spah ron ha ka jingiakhun ha Nagpur bad da kata ka jingseisoh, u lahkiew mynta da ar jaka sha ka kyrdan ba 8.Kumjuh ruh u nongapwiket u Rishabh Pant, u ban ymialehkai ha ki khyndiat por ki ban wan hadien ka jingaksiden ka jong u, u long uwei pat u nongtied ka kynhun uba lah rung sha ka thup ba 10 da kaba shah buh mynta ha ka kyrdan ba 7.
Haba phai sha ki nongialehkai ka Australia, u nongtied nyngkong ka kynhun u David Warner bad Usman Khawaja ki lah ioh ia ka bainong jong ki halor ka jingshah pynliem noh ka jong ki arsien ha ka por ialehkai kaba kloi eh. Kumta da katei ka jingjia, u David u lah hiar da haduh hynriew jaka sha ka kyrdan ba 20 katba u Khawaja ulah shah pynhiar ar jaka sha ka kyrdan ba 10.Kumjuh ruh ki arngut ki rangialehkai ka Australia; u Marnus Labuschagne bad Steve Smith ki lahioh ban shong ha ki ar kyrdan ba shakhmat ha ka thup lemn bad u kapten ka Pakistan u Babar Azam ha ka kyrdan balai.
Ha ka thup kyrdan jong ki ‘All-Rounders’, u Axar Patel u lah kynthih da hynriew jaka sha ka kyrdan ba 7 ha ka jingialehkai Test hadien ba u lah wan sha ka madan ialehkai da ka jinglah ban kamai 240 na ka 7. Ka khubor ka iathuh ruh ba ka jingiakhun Test kaba ar hapdeng ka India bad Australia kan long ha nongbah New Delhi lashai ka sngi (Thohdieng).
