Kolkata, Rymphang: Ka long ka khubor jong ka jingduhnong kaba khraw ia ka ri baroh kawei khamtam eh ia ka kynhun ialehkai phutbol ka ri India, ha kaba uwei na ki khlur ialehkai barim ka ri uba lah khur ruh ia ka takma Ksiar ha ka Asian Games bad u nongialehkai Olympic ba pawkhmat ka ri u Tulsidas Balaram u lah khlad noh ha ka rta ba 87 snem hadien ba ban ka jingpang mynta la bun bun snem.
U Balaram u long u briew u bym shym la don shuh ka kurim bad uba shong ba sah ha rudnong jong ka wah Hooghly ha Uttarpara. Kumta utei u rangialehkai Asian Games ha u snem 1962 u lah shah pynkit sha ka jaka sumar naduh ka 26 tarik u Nohprah 2022 bad uba lah shah sumar namar ka jingshitom kaba lah bat ha ka met jong u. Kum u rang-ialehkai ba paw ha ki snem ba mynshuwa jong ka kynhun ialehkai ka ri, u Balaram u long ruh u dkhot ba iadonbyntalang bad ka kynhun ialehkai ka ri ha ki 1950s bad 60s, ha kaba u lah pyniadeilang ialade bad ki khlur ialehkai ka ri kum u Chuni Goswami bad PK Banerjee. Kum u rangialehkai ba pawnam ka ri uba lah khur ia ka khusnam Arjuna, u Balaram u lah long uwei na ki nongialehkai ba paw ha u snem 1960 ha ka Olympic ba lah long ha Rome. Ha katei ka lympung ialehkai, ka kynhun ialehkai ka ri kaba lah shah buh ha ka ‘Group of Death’ bad ka Hungary, France bad Peru, ka kynhun ialehkai ka ri ka lah mad ia ka jingshah pynliem noh ha kaba sdang jong ka jingiakhun pyrshah ia ka Hungary da 1-2 hynrei u Balaram u lah pynkhie-im ialade sha ka burom da kaba kamai ia ka kol ha ka 79 min ialehkai.
Dei ha u snem 1963 ba u Balaram u lah iehnoh ia ka kam ialehkai kaba u ju ieid ban ialehkai kum u rangialehkai shakhmat ne kum u Wing ruh kumjuh ha ka kynhun ialehkai ka ri, na ka daw jong ka jingsdang ban ktah ka jingshitom ha ka met jong u.
