Shillong, Rymphang 17: Ka Shillong Cricket Association ka la sdang ïa ka lympung ïalehkai Super Division Cricket League ha ka sngi Thohdieng ha kaba ka United Xl ka la khur ïa ka jingjop, hadien ba ka lah pynliem noh ïa ka Sputnik Spartan da 34 run ha madan Polo.
Ha kane ka jingïakhun, ka United Xl ka la ïoh kam trai ban tied nyngkong ha kaba ka la kamai 185 run bad shah pynkhyllem 8 wiket ha ki 40 over. U Babloo Passah u la tied 41 run na ki 51 bol bad u Rohit Thapa u la ïoh 37 run na ki 44 bol. Katba u Arbin Singh u la khur 3 wiket bad ïa ki 2 wiket la khur da u Gagan Deep na ka bynta ka Sputnik.
Haba wan beh ïa ka thong, ka Sputnik Spartan ka la kamai tang 151 run bad shah pynkhyllem 10 wiket ha ki 34.4 over. U Abhishek Gupta u la khyrwit ïa ka shiteng spah da kaba ïoh 76 run na ki 76 bol bad u Kush Agarwal u la tied 23 run na ki 36 bol. Katba u Jason J. Lamare u la khur 5 wiket bad ïa ki 2 wiket la khur da u Navin Kumar na ka bynta ka United. Ïa ka nam ‘Man of the Match’ la khur da u Jason.
