Shillong, Rymphang 17: Ka nongbah Guwahati kan ïoh ban pynlong ha ka sien kaba nyngkong eh ïa ki jingïalehkai Indian Premier League (IPL) ka ban sdang ha u Ïaïong hadien ba ka Board of Control for Cricket in India (BCCI) ka la ailad ïa ka Rajasthan Royals ban pynlong ïa ki ar tylli ki jingïalehkai ha la ïing ha katei ka thaiñ shatei lammihngi ha ka sngi Thohdieng.
Ka Rajasthan Royals kan ïakhun nyngkong pyrshah ïa ka Punjab Kings bad hadien kan ïakhun pyrshah ïa ka Delhi Capitals, la ong u CEO ka Assam Cricket Association (ACA) u Pritam Mahanta.
“Ngi sngewkmen ban pynbna ba ka ACA Stadium, Guwahati kan pynlong ïa kitei ar tylli ki jingïalehkai jong ka Tata IPL ha ka 5 bad 8 tarik u Ïaïong mynta u snem,” la ong ka kyrwoh.
“Ka nongbah Guwahati kan long kum ka jingïalehkai ha la ïing na ka bynta ka Rajasthan Royals,” u la bynrap. Kumta ka Rajasthan Royals kan pynkhreh ïa kiwei pat ki jingïalehkai kiba dangsah ha la ïing ki ban long ha Jaipur.
Ïa ka Guwahati la ai bynta ïa ka Rajasthan Royals na ka bynta ar tylli ki jingïalehkai ki ban long ha u Ïaïong jong u snem 2020, hynrei ym shym la lah ban pynlong na ka daw ka jingsaphriang ka khlam COVID-19 bad ka jingpyrkhing ïa ki kyndon. Dangshen katei ka kynhun kaba na Jaipur ka la ïateh lok ba ka ACA na ka bynta ban seng ïa ka shlem ai jinghikai, ha kaba mynta ka urlong ha ACA Stadium.
Na ka liang ka BCCI ha ka sngi Thohdieng ka la pynbna ïa ki prokram ïalehkai jong ka IPL. Kin don haduh 70 tylli ki jingïalehkai kiba yn pynïakhun ha ki 12 tylli ki jaka ïalehkai ki ban neh haduh 52 sngi. Kane ka lympung kan sdang naduh 31 tarik u Lber.
