Shillong, Rymphang 19:
Ka Thangsning SCC bad ka Lumpaïa Avengers CC ki la khur ïa ka jingjop ha ka lympung 2nd District League T20 Cricket Tournament 2023 ba la pynlong da ka East Khasi Hills Cricket Association ha madan Smit.
Haba phai sha ka jingïalehkai hapdeng ka Thangsning SCC pyrshah ïa ka Friends United CC, ïa ka jingkynting pisa la jop da ka Thangsning SCC bad kam trai shwa ban kawang bol.
Ki nongtied ka Friends United CC kiba la tied nyngkong ki la lah ban kamai 112 run na ki 20 tylli ki over bad hap noh 8 wiket. U Bryan Mac Millan Marbaniang marwei u la tied 27 run katba u Khrawkupar Kharumnuid pat u la khur 2 wiket na ki 4 over bad ai tang 11 run.
Haba beh ïa kane ka thong, ka Thangsning SCC ka la kot tang ha ka over kaba 15.5 da kaba kamai 113 run bad hap 5 wiket. U Badap Pura Nongkhlaw marwei u la tied 39 run bad u Khrawkupar Kharumnuid u la tied 34 run, katba u Wansiewdor Lyndem u la khur 3 wiket na ki 3 over bad ai 14 run.
Ka Thangsning SCC ka la jop ïa kane ka jingïalehkai da 5 wiket bad ha kane ka jingïaleh-kai u Khrawkupar Khar-umnuid u la khur ïa ka nam ‘Player of the Match’.
Ha kawei pat ka jing-ïalehkai, ka Pomshutia kaba la tied nyngkong ka la lah ban kamai tang 54 run na ki 13.5 over bad hap lut baroh ki wiket. Tang u Aristerwell Suting u la kamai 10 run na ki 22 tylli ki bol, katba u Ralphy Heinrich Diengdoh u la khur 3 wiket na ki 3 over bad ai 14 run bad u Daryll Donald Nongbri u la khur 2 wiket bad ai tang 4 run na ki 2.5 over.
Haba beh ïa kane ka thong, ki nongtied ka Lumpaia Avengers ki la lah ban pyndep tang ha ka over ba 11.5 da kaba tied 58 run bad hap 5 wiket. U Easterland Iangrat u la tied 20 run katba u Aristerwell Suting u la khur 3 wiket na ki 4 over.
Ka Lumpaia Avengers CC ka la jop ïa kane ka jingïalehkai da 5 wiket bad u Ralphy Heinrich Diengdoh u la khur ïa ka nam ‘Player of the Match’.
