Sydney, Rymphang:
Na ka liang ka sorkar kaba lamkhmat ia ka ri Austrlia bad ka sorkar jylla jong ka Queensland ki iathuh ba ha ka jingiatreilang mynta kin sa pynlut lang haduh A$7.1 billion ($4.9 billion) na ka bynta ban thaw ia ki madan ialehkai ba thymmai bad ruh ha ka ban pynthymmai bad pynbha shuh shuh ia ki madan ialehkai kiba dangsah ha ka jingpynkhreh jong ka ri baroh kawei ban pdiang ia ka lympung ialehkai Olympic ha u snem 2032 ha Brisbane.
Kumta ha kaba iadei bad katei ka jingpynkhreh ha ka ban pynlut ia kiei kiei baroh da kitei ki ar tylli ki sorkar bahakhmat, na ka liang jong ka sorkar bahakhliehduh jong katei ka ri kan pynkhreh ha ka ban theh A$2.5 billion na ka bynta ban nang iai pynbha bad kyntiew shuh shuh ia ki madan ialehkai baheh ha Brisbane; ha kaba ka jingtyrwa mynta ka long ban don ia ki madan ialehkai ki ban ngiam briew haduh 17,000; katba ka sorkar jylla jong ka Queensland kan pynkhreh ia ka song pisa kaba A$2.7 billion na ka bynta ban thaw biang sa shisien pat ia ka madan ialehkai Kriket jong ka Gabba.
Shuh shuh ruh ka khubor ka iathuh ba 16 tylli ki madan ba thymmai ne ki ban sa shah kyntiew kyrdan sha ka rukom kaba kham janai shuh shuh, kin ioh ia ka song pisa kaba A$1.87 billion ha ka jingiasynnianglang jong ki ar sorkar kaba long da mar shiteng (50/50) katkum ka jing-iakut ka jong ki.
Kumta ruh ka Brisbane kan kylla long ruh ka nongbah kaba lai jong ka ri Australia kaba lah ioh ha ka ban pynlong ia ka lympung ialehkai Olympic jong ka aiom lyiur hadien ba ka Melbourne ka lah dep ban shim ia ka bynta ha u snem 1956 bad ka Sydney ha u 2000. Kumba ka long mynta ka Queensland ka lah don lypa 80% jong ki madan ialehkai kiba donkam na ka bynta ban pynlong ia ki jingialehkai ryngkat bad ka jingkhmih lynti ha ka jingpynbha bad tei thymmai ia ki na ka bynta ban dang lah ha ka ban pyndonkam ia ki madan ha ki por ki ban dang wan kata hadien ba lah dep ban pynlong ia ki jngialehkai.
Kumba ka paw mynta ka long ba ka jinglut baroh na ka bynta ban pdiang ia ki jingialehkai baroh jong ka lympung, katei ka ri ka lah pynthymmai da kaba pynkiew sha ka A$7 billion na ka A$5 billion, bad ki nongpyniaid bahakhmat jong kitei ki ar sorkar ki pynpaw ba kin ym wad satia kino kino ki lad jingiarap ne jingnohsyniang na ka International Olympic Committee.
Ka madan ialehkai baheh ha Brisbane kan sa pynlong ruh ia ka Olympic & Paralympic jong ka jingialehkai iakob jngi-um bad polo da kaba pyndep pura ia ka thup kyrteng jong ki madan ialehkai ki ban sa pynlong ia ki 16 tylli ki rynsan ialehkai hapoh ka jingjngai ha ka jingiaid kjat kawei ka madan ialehkai na kawei pat.
Kumta ruh ka jingthaw mynta ia ka madan ialehkai kaba heh ha Brisbane la thmu ha ka ban sdang noh ia ka jingtei ha u snem 2027 bad ia kaba la khmih lynti ruh ban lah pyndep pura la kumno kumno haduh u snem 2030.
Katei ka lympung ialehkai ka ban sa long ka khmih lynti ruh ha ka ban iohlum haduh A$8.1 billion ha ka liang ka ioh-ka-kot bad ki jingmyntoi ha kiba bun ki liang ha sha ka Queensland, bad palat A$17.6 billion sha ka Australia.
