Shillong, Rymphang 19:
Ka Punjab bad Karnataka ki la lah ban pynthikna ïa ka jaka ha ka semi-final jong ka lympung 76th National Football Cham-pionship jong ka Santosh Trophy, ka jingïalehkai ka ban sa long ha King Fahd Stadium ha Riyadh.
Ka jingïoh rung jong ka Punjab sha ka semi-final ka la long hadien ba ka la lah ban ïakhaid noh da mar shi kol ha ka jingïalehkai pyrshah ïa ka Kerala, katba ka Kerala kaba dei ka lahduh jong kane ka lympung ha ka snem ba la lah, ka la duh ban buh jaka ïalade ha ka semi-final.
Haba phai sha ka jingïalehkai, dei ka Kerala kaba la khyrwit kol nyngkong lyngba u Vishak Mohanan ha ka minit kaba 24 hynrei tang hadien 10 minit kata ha ka minit kaba 34, ka Punjab ka la ïoh ban pynphai ïa kane ka shi kol lyngba u Rohit Sheikh.
Ka Kerala ka la hiar sha madan da kaba tip ba tang ka jingjop kan lah ban kyntiew ïa ka sha kawei pat ka kyrdan hynrei watla ka la sdang ha ka rukom kaba biang bad ïoh ruh ban khyrwit kol hynrei kam shym la lah pat ban pynneh ïa kane ka rukom.
Ha kawei pat ka jingïa -lehkai, ka Karnataka ka la ïakhaid da mar 2 kol ha ka jingïakhun pyrshah ïa ka Odisha bad kane ka la biang pura ïa ka Karna-taka ban ïoh buh jaka ïalade ha ka semi-final.
Haba phai sha ka jingïalehkai, dei ka Karnataka kaba la khyrwit kol nyngkong lyngba u M Sunil Kumar ha ka minit kaba 17, hynrei ki rangïalehkai ka Odisha kiba la ïakhun tyngeh ki la ïoh ban khyrwit ar tylli ki kol kata ha ka minit kaba 21 lyngba u Prabin Tigga bad ha ka minit kaba 35 lyngba u Chanra Muduli bad haduh ba kut ka kylla step ka la tam da 2-1 kol.
Dei ha ka minit kaba 50 jong ka kylla miet bad ka Karnataka ka la ïoh ban pynphai ïa ka kol kaba ar kaba la wan lyngba u Shajan Franklin.
Ha kawei pat ka jingïalehkai, ka Maharashtra ka la lah ban pynliem noh ïa ka Goa da 2-0 kol bad ïa kine ki kol la thep da u Himanshu Patil ha ka minit kaba 5 bad 89.
Kane ka jingïalehkai hapdeng ka Maharashtra bad Goa ka la long tang ban shu pyndep rukom hadien ba baroh ar liang, ki la kut noh ka lynti ban jam shakhmat.
