Shillong, Rymphang 20:
Ka KSU Mawlai Circle ka la pynhap pyrda noh ïa ka Maitshaphrang Khasi League Basketball Tournament 2023 ha kaba ka Dubakh ‘A’ bad ka Jaïaw Pdeng ki la khur ïa ka nam lahduh ha ka Lah Sngi U Blei.
Ha ka jingïakhun final jong ki kynthei hapdeng ka Dubakh ‘A’ pyrshah ïa ka Dubakh ‘C’, ka Dubakh ‘A’ ka la khur ïa ka jingjop, katba ha ka liang ki shynrang ïa ka nam lahduh la rah da ka Jaïaw Pdeng kaba pynliem ïa ka SYM.
Ïa katei ka lympung la wan ban pynhap pyrda noh da u Bah Danny M. Khyrïem, Vice – President barim jong ka KSU Sengkmie. Hashwa ban pynhap pyrda ka la don ka jingïalang kaba lyngkot ba la pynïaid da u Samla Mekenson Marbañiang Asst Finance Secretary KSU Mawlai Circle, la ïoh ïa ka jingkren pdiang sngewbha bad maitphang na u Samla Rapborlang Nongrum General Secretary KSU Mawlai Circle. Haba ai jingkren na ka liang jong utei u nongïalam u la pynpaw ba ka jingshim jong ka KSU ban pynlong ïa kiba kum kine ki lympung ïalehkai ka long ban pynshlur ïa ki khun samla jong ka jaidbynriew ba kin sei ïa la ki sap kaba ki don.
U Samla Eric Nongkynrih, Assistant General Secretary KSU Central Executive Council haba ai jingkren kum u Symbud Kongsan, u la ai mynsiem ïa ki samla ba kin ïashim bynta ha kiba kum kine ki jingïalehkai. U Bah Danny M. Khyrïem u la pynkynmaw ba ka KSU dang ha kine ki sngi ba dang shu dep, ka KSU Sengkmie ka dang dep pynhap pyrda ïa ka Maitshaphrang Khasi League 20twenty Cricket Tournament kaba long ka jingailad ïa ki khun samla ha katei ka jingïalehkai.
Na ka liang jong utei u nongïalam barim u la pynkynmaw ba ha ki por ba ki dang don ha ka Seng ki ju pynrung kam ïa ki nongïalehkai ha ki shlem treikam bapher bapher halor ka nongrim ba ka don ka sports Quota. Nangta, u la pynpaw ruh ka jingbynñiaw haba ïanujor ïa la ka Jylla bad ka Jylla Manipur naba ha man la ki jingïalehkai ki samla Manipur ki don beit kumjuh ruh la ka dei ha ka eksam UPSC na Jylla Manipur yn ym duna ïa ka 3 ngut ki ban pan IPS ne IAS. Kumta u la ai mynsiem ïa ki khun samla ba kin trei shitom la ha ki jingpule ne ha ki kam ïalehkai khnang ba ka Jylla jong ngi kan kiew shaphrang shajrong.
