Shillong, Rymphang 21:
Ka Sunrise Cricket Club ka la khur ïa ka jingjop ha ka lympung ïalehkai First Division Shillong Cricket League 2022-23, hadien ba ka lah ban pynliem noh ïa ka Nongthymmai S.C.C da 151 run ha ka Sngi Ba-ar ha madan Polo.
Ha kane ka jingïakhun ka Nongthymmai kaba la jop ïa ka jingkynting pisa, ka la ailad shwa ïa ka Sunrise ban kan tied nyngkong. Ka Sunrise haba wan ban tied ka la kamai 301 run bad shah pynkhyllem 7 wiket ha ki 35 over. U Basant Chettri u la ïoh ban khyrwit ïa ka shiteng spah da kaba ïoh 68 run na ki 65 bol ryngkat bad u Bishnu Mahato uba la khyrwit 57 run na ki 39 bol. Katba u Kunal Lama bad u Prem Lama ki la khur mar 2 wiket na ka bynta ka Nongthymmai.
Haba wan beh ïa ka thong, ki nongtied ka Nongthymmai ki la shah pynkhyllem lut baroh ki nongtied bad kamai 150 run ha ki 33.3 over. U Sandeep Chanda u la tied 43 run na ki 57 bol bad u Shyam S. Pachar u la ïoh 16 run na ki 18 bol. Katba u Basu Chettri u la khur 4 wiket bad ïa ki 2 wiket la khur da u Bhuwan Thapa na ka bynta ka Sunrise. Ïa ka nam ‘Man of the Match’ la khur da u Basant Chettri.
