Spain, Rymphang:
Ka LaLiga bad ka Fundacion LaLiga ha ka jingiasnoh kti lang ruh ka Vicente Ferrer Foundation ha ka jingiatreilang kum kawei ka kynhun bad ka Rural Development Trust, ki lah jied ia 20 ngut ki khynnah kynthei na ka imlang-sahlang jong kawei ka shnong nongkyndong ha Anantapur na ka bynta ba kin ioh pdiang ia ka song pisa jingiarap bad ka bai-bam ha kaba iadei bad ka pule puthi na ka bynta shi snem kynthih.
Dang shen, ia ka All-India tournament ruh lah dep ban pynlong ha Anantapur Sports Academy ia kaba lah pyniaid da ka RDT na ka bynta ban kyntiew 9ia ka mynsiem jong ka jingialeh-iakhun hapdeng ki khynnah kynthei.
Kumta ki nongmihkhmat jong ka LaLiga bad ka Fundacion LaLiga ki lah leit ban jngoh ia ka distrik Anantapur ha ki lai sngi kynthih na ka bynta ban pyntyllun ia la ki kam ki jam kiba long seisoh ha ka jingai jinghikai ia ki khynnah shynrang bad kynthei ha ka liang ka phutbol ha ki thain nongkyndong. Nangta, la ong ba haduh 2,000 ngut ki khynnah kiba don hapdeng ka rta ba 7-15 snem ki lah ioh ia ka lad na ka bynta ban shah hikai bad pyntbit ialade ha katei ka jait jingialehkai ha ki por jong ki san snem mynshuwa. Na kitei baroh ki khynnah, kita ki 20 ngut ki khynnah kynthei ki lah shah jied na ka bynta ba kin pyniasoh ha ka skul ai jinghikai na ka bynta ba kin ioh ia ka jingshah hikai kaba pura.
