London, Rymphang:
Katkum ka khubor ba la ioh lum ka iathuh ba u trai jong ka klob ialehkai phutbol English Premier League ka Liverpool u John Henry na ka ri USA, u lah pynpaw ba kam shym la don satia kano kano ka jingthmu ne ka jingpynkhreh na ka bynta ban die noh ia katei ka klob ialehkai, hadien ba ki trai jong katei ka klob kiba la iasnohktilang ban long trai ia ka ki lah pynpaw ha u Naiwieng ia ka jingpynkhreh ban dei noh ia katei klob ialehkai.
Kumta ha kaba iadei bad katei ka bynta, ka Fenway Sports Group (FSG) kaba lah pyndep pura ia ka jingshimti jong ka ia ka klob baroh kawei ha ka dor 300 million pounds ($358 million) ha u snem 2010. Ha ki lai bnai ba lah leit noh ka iathuh ba kan sa pynpaw ia kata ka lynti ba ka lah jied na ka bynta ban wanrah shakhmat ia ki nongpynlut-nongiarap lada kita ki pynpaw ia ka jingkwah jong ki ban long-trai ia ka klob. Hynrei hadien ka jingpynpaw ba nyngkong da ka FSG lyngba ka kaiphod ka jong ka, na ka liang jong u Chairman katei ka klob ialehkai u Tom Werner u iathuh ba kam shym la don kano kano ka jingpynkyrkieh na ka bynta ban pyndep pura ia kino kino ki jingiateh kiba long donkam bad hakhmat eh. Na ka liang jong u Henry u iathuh ruh ba haduh mynta kam shym la don kano kano ka jingthmu na ka bynta ban die noh ia ka klob watla ka lah don ka jingiakren bad ki katto katne ki nongpynlut ha kaba iadei bad ki kam ki jam na ka bynta ka klob bad lehse kan sa don kano kano ka jinglah ban seisoh hynrei ym pat ka jingkhreh ban die noh ia ka klob.
