New Delhi, Rymphang:
Na ka liang jong ka Indian Olympic Association (IOA) ka pynbna ba ka la pynkhreh ban sam ia ka jingioh myntoi ha ki jingsumar bapher bapher ia kaba la tip kum ka ‘Medical Insurance’ sha ki nongialehkai kiba mynta bad barim ruh kumjuh; kiba la lah ha ka ban wanrah ia ka nam bad ka burom sha ka ri baroh kawei na ki lympung ialehkai Olympic.
Katei ka synjuk ha ka por ba ka pynlong ia ka jingialang kaba heh jong ka Komiti nongkitkam ka jong ka ia kaba dang shu dep ban pynlong ha Olympic Bhawan, ka lah shim ruh ia ka rai halor katei ka bynta sha kita ki nongialehkai bahakhmat eh jong ka ri kiba ju iai khur takma ha ka lympung ialehkai na ka por sha ka por. Kumta ka lah pynpaw ruh ba ka long kaba biang shibun eh ba bun na ki nongialehkai barim ka ri kiba lah khur ia ki takma bapher bapher ha bun ki jingialehkai ki long ki bym biang satia ha ki bad buh ia ka jingeh kaba khraw na ka bynta jong ki ia ka jingbym thikna ia ka jingioh jingsumar kaba nyngkong ba ki dei ban ioh. Kumta katei ka synjuk ka lah shim ia katei ka rai ka lah shim ia ka rai halor katei ka bynta khlem da donkam ban siew wat shi damli ruh da ki nongialehkai kiba ju wanrah ia ka nam bad ka burom sha ka ri. Shuh shuh katei ka synjuk ka lah rai ruh ba ym tang ki nongialehkai barim kin ioh ia ka tei ka jingmyntoi, hynrei wat ki nongialehkai ba mynta ruh kumjuh kiba shimbynta bad don ia ka thong ha ki ban khur takma na ka bynta ka ri.
Namar kata, na ka liang jong ka IOA kan iatreilang ruh bad ka NSFs bapher bapher na ka bynta ban ithuh ia kita ki nongialehkai ka ri ki ban ioh ia katei ka jingmyntoi ha ka jingim ha kaba iadei bad ka jingiai ioh ia ka met ka phad kaba koi tba khiah. Ha katei ka jingialang lah shim ruh ia ka rai na ka bynta ban thung ia ki briew kiba tbit bad ba shemphang na ka bynta ki shnat treikam bapher bapher khnang ban dup ioh ia ka rukom treikam kaba biang bad ba seisoh na ka bynta ban lah ha ka ban pyntreikam ia baroh ki jingdonkam jong ka National Olympic Committee (NOC).
