England, Rymphang:
Kawei na ki klob ialehkai phutbol ha ka lympung English Premier League kaba haduh mynta ka shem jingeh ha ka ban kiew ha ki kyrdan ba shakhmat ha ka miej khein dor-thong katei ka lympung ialehkai, ka Southampton ka pynbna paidbah mynta ia ka kyrteng jong u Ruben Selles kum u manager ba thymmai. Kane ka wan urlong hadien ba katei ka kynhun lem bad u ki lah pdiang ia ka jingiateh soskular hapdeng jong ki haduh kaba kut jong ka aiom ialehkai kaba mynta.
Ka khubor ka iathuh ruh ba ka jingthung mynta da ka klob ia u Ruben na Spain ka long hadien ka jingsloit noh jong ka dang ha ki khyndiat sngi ba lah dep ia u Nathan Jones; uba lah ioh ban pynthyllun ia ka shalyntem ki kam ki jam katei ka kynhun tang ha ki lai bnai kynthih.
Kumba ka paw mynta, ka klob Southampton ka shong mynta ha ka kyrdan ba sha-trai eh ha katei ka lympung ialehkai ha ryngkat bad ki san tylli ki jingjop ba ka lah khur ha ki 23 tylli ki jing-iakhun jong ka haduh mynta ha kane ka aiom ialehkai kaba mynta.
U Selles u long u nongpyniaid ba nyngkong jong ka kynhun ialehkai ba shakhmat jong ka klob bad uba lah shimti kum u nongpyniaid ba tang ship or ha kaba katei ka klob ka la lah ban pynliem noh ia ka Chelsea dang ha ka lah kut taiew ba lah dep ha kaba lah kylla long u soh na ka bynta katei ka kynhun ialehkai ban khur ia ki 3 dor-thong na u lain jong ka jingma ha ka lympung.
Ka jingthung jong ka klob ia u Selles mynta ka long hadien ba katei ka kynhun ialehkai kam shym la lah ban pynurlong ia ka jingiakren bad u manager barim ka Leeds u Jesse Marsch; uba lah shah sloit noh na ka kam dang ha ki khyndiat sngi ba lah dep.
Kumta ka jingkhur jingjop da 1-0 kol pyrshah ia ka Chelsea ha ka jingleit iakhun jong ka sha Stamford Bridge, ka pynlong ia ka tei ka kynhun ialehkai ban khur ia ka jingjop ba nyngkong napdeng ki jingiakhun baroh naduh ba ka lah dep ban khur ia ka 2-1 kol jingjop pyrshah ia ka Everton ha ka 14 tarik u K’lyngkot mynta u snem. Shuh shuh ka khubor ka iathuh ruh ba u Selles uba lah dep ban shimti teng ia katei kajuh ka kam kaba kynthup ha ka kynhun ialehkai kaba na Greece, Azerbaijan bad Denmark, dang shen u lah dep ban pynbna ia ka jingkwah jong u ban long u manager jong ka klob kum u nongpyniaid bapura jong kano kano ka kynhun ialehkai kaba ibit ia u ban thung ha ka kam.
