Shillong, Rymphang 24:
Ka tnat ïalehkai jong ka Sorkar Pdeng ka la don hapdeng ka jingsngewkhia halor ka jingbym leit ïashim bynta ki khlur nongïalympat shabar ri na ka daw ban pynpaw ka jingpyrshah ïa ka Wrestling Federation of India (WFI) bad kumjuh ïa u nongïalam kane ka synjuk u Brij Bhushan Sharan Singh.
Ki khlur nongïalympat ka ri kiba kynthup ïa ka Vinesh Phogat, Bajrang Punia, Ravi Dahiya, Deepak Punia, Anshu Malik bad ka Sangita Mor kiba la weng noh ïalade na ka jingleit ïashim bynta ha ka UWW Ranking Series ka ban long ha Zagreb bad Alexandria namar ka jingtohkit ka dangslem ban pyndep halor ka jingjrong kti utei u nongïalam ka WFI.
Katei ka rai ka la pynkhuslai ïa ka Sorkar, kaba la pynbiang ïa ka bai-lut bai-sep ïa ki nongïalympat hapoh ka Target Olympics Podium Scheme (TOPS) ban kyrshan ha ki jingkilanmet.
“Ngim lah ban sngewthuh balei kim kwah ban ïashim bynta ha kaba ïa ki jingdawa la shim khia. Ngi donkam ban ai por ïa ka komiti ba kan pyndep ïa baroh ki jingshisha. Ka dei ka rai jong ki nongïalympat bad ngim lah ban pynbor ïano ïano, hynrei kim dei ban pynlehnohei ïa ki lympung ïalehkai,” la pynpaw ki heh ophisar jong katei ka tnat.
Ïa katei ka synjuk ïalehkai la pynïaid da ki hynriew ngut ki dkhot jong ka Oversight Committee hapoh ka jingïalam ka khlur nongïakura ka MC Mary Kom.
Na ka liang ka komiti ka dang pynlong ïa ki jingtohkti halor ka jingkynnoh ba u Brij Bhushan u la jrong kti bad pynshitom ïa ki nongïalympat kynthei bad u la byrngem ruh ïa ki nongïalehkai.
Na ka liang katei ka tnat ka la shah pynbor ba ka dei ban sei ïa ka komiti hadien ba ki nongïalympat ki la pynlong ïa ka jingïalang ban pynpaw ka jingpyrshah ha Jantar Mantar kaba ha nongbah Delhi na ka bynta ban dawa weng noh ïa u Brij Bhushan na katei ka kam kaba u bat bad ruh ban pynkut noh ïa ka jingpynïaid ka WFI.
Ka tnat ïalehkai ka la kyntu ïa ka komiti kaba la thaw ha ka 23 tarik u Kyllalyngkot, ba kan phah ïa ka kaiphod hapoh ki saw taïew bad ka la bthah ïa u Brij Bhushan un hiar shuki shwa tad haduh ba ka lah ban pyndep ïa ka jingtohkit.
Kat kum ka jingai por kaba kham hashwa, ka komiti ka dei ban phah ïa ka kaiphod ha ka 23 tarik u Rymphang, hynrei na ka liang ka tnat ïalehkai ka la ai por sa ar taiew hadien ba katei ka komiti ka la pan por ban pyndep ïa katei ka jingtohkit.
