Melbourne, Rymphang:
Katkum ka khubor ba la ioh lum ka iathuh ba u kapten jong ka kynhun ialehkai Test ka Australia u Pat Cummins un sa duh noh ban iashimbynta ha ka jingiakhun Test kaba lai jong ka lympung Border-Gavaskar Trophy ha ka jing-iakhun pyrshah bad ka India. Katei ka jingiakhun lah dep ban pynbeit ba kan long ha Indore naduh ka 1 tarik jong u bnai Lber.
Shuh shuh ruh ka khubor ka iathuh ba u Cummins uba la leit phai iing sha Sydney hadien ka jingshah rem noh ka Australia ha ka jingiakhun Test ba ar na ka daw jong ka jingshitom ka kmie. Hynrei ia kaba lah khmih lynti ban wanphai biang sha ka kynhun ialehkai ka ri na ka bynta ban sdang pat sa ia ka jing-iakhun kaba lai. Kumta ruh na ka liang jong u tei u rang-ialehkai u lah pynthikna ia ka jingbym shym la lah ban iadonlang bad ka kynhun ha ka tei ka jingiakhun ka ban wan halor katei ka daw. Kumta ha ka jaka jong u, na ka liang jong ki nongjied nongialehkai katei ka kynhun ki lah rai ha ka ban pynmih bujli noh da u Steve Smith na ka bynta ban ialam ia ka kynhun baroh kawei sha katei ka jing-iakhun ka ban sa long.
Da ka jingioh shong pynjahthait jong ki ar kynhun ialehkai haduh khyndai sngi kynthih hapdeng jong ka jingiakhun Test ka jong ki hadien ba lah pyndep ia ki lai sngi ialehkai ha Delhi, kumta ruh lah khmih lynti ba u Pat Cummins un sa pyniasoh biang bad ka kynhun na ka bynta katei ka jingiakhun kaba lai. Hynrei ha kawei pat ka liang, u Smith u lah pynlut ia ki saw sngi ha Dubai lem bad ka kurim jong u hadien ka jing-iakhun Test kaba ar ha shua ba un pyniasoh bad ka kynhun ha Delhi. Lehse, u lah ruh ban ialam ia ka kynhun na ka bynta ka sien kaba lai naduh ba u lah shah pynkupbor biang kum u symbud kapten ha u snem 2021 ha ka por ba u Cummins u lah shimti kum u nongialam bahakhmat ka kynhun ha ka jaka jong u Tim Paine.
