Astana, Rymphang:
Uwei na ki nongialehkai rah-nar na ka ri Kazakhstan uba lah khur ruh ia ka takma Rnong ha ka Tokyo Olympics ha u snem 2021 u Igor Son, u lah shah khang shim bynta ha kino kino lympung ialehkai haduh 8 snem kynthih namar ka jingdih drok.
Kumta na ka liang jong ka Weightlifting Federation of the Republic of Kazakhstan (WFRK) ka iathuh ba utei u rangialehkai uba lah khur ia ka takma Rnong na ka jingiakob rah-nar ha ka 61kg ha katei ka lympung ialehkai Olympic ha Tokyo, u long napdeng ki hynriew ngut ki nongialehkai na katei ka ri ban ngat mynta ha katei ka jingshah pynshitom.
Shuh shuh ruh dei ha u bnai Lber 2022 ba lah mih ka kaiphod ba nyngkong ba kitei ki nongialehkai ki don bynta ha ka jingdih ia ki dawai khleh droks hadien ba lah dep ban leh ia ka jingpeitbniah ha ki bad katkum ki nongmuna ba lah lum-thup da ki nongpyniaid bahalor jong ka Anti-Doping ka Kazakhstan.
Ka long ruh ka sien kaba ar ha ka jingim ialehkai ka jong u Son ban shah sospon ialehkai biang sa shisien hadien ba u lah dep ban shah pynngat ha ka jingshah pynshitom kaba nyngkong da haduh hynniew bnai kynthih ha u snem 2015.
Na ka liang jong ka WFRK ba ka jingseisoh halor ka jingleh ia ka jingpeitbniah ia u Son kan ym ialam ia utei u nong-ialehkai ban shah sloit noh ka takma ba u lah khur na ka lympung ialehkai Olympic.
U General Secretary ka WFRK u Aldiyar Nuralinov u iathuh ba ka jingleh ia ka jingpeitbniah kaba long shabar jong ka lympung ialehkai lah shim hadien hynriew bnai kata hadien ka lympung ialehkai shabar-ri ha kaba ki nongialehkai katei ka ri ki lah leit ban shimbynta.
Kumta kam shym la don kano kano ka mat iakren na ka bynta ban sloit noh ia ki na ki kam ba seisoh ba ki lah ioh ban kheit ne ba kin hap ban pynphai noh ia ki takma ba ki lah khur.
Ka ri Kazakhstan ka don ia ka khana-pateng kaba jrong jong ka kam dih droks ha ka kyrdan ba hakhmat eh jong ka jingialehkai rah-nar.
Kumta ruh katei ka ri ha ka thain ba shapdeng jong ka dewbah-Asia ka lah shah sloit noh ki takma ba lah khur da ki nongialehkai naduh u snem ialehkai Olympic ba ka ri ka lah ioh ban shimbynta kata ha u 2008, 2012 bad 2016 na ka daw jong kiba bun tylli ki jingpynkhein jong ka ia ki kyndon ka Anti-Doping.
